ദില്ലി : ബാബ്രി മസ്ജിദ് നിലനിന്നിരുന്ന സ്ഥലത്ത് സുപ്രീം കോടതി അനുമതിയോടെ ഉയരുന്ന രാമക്ഷേത്രം മുഴുവന് ഇന്ത്യക്കാര്ക്കും അഭിമാനമാണെന്ന പ്രധാനമന്ത്രി നരേന്ദ്രമോദിയുടെ പ്രസ്താവനയില് വിയോജിപ്പറിയിച്ച് സോഷ്യല് മീഡിയ. പ്രധാനമന്ത്രി പറഞ്ഞ ആ 130 കോടിയില് ഞങ്ങളിലെന്ന കാമ്പയിന് ആണ് സോഷ്യല് മീഡിയ ഏറ്റെടുത്തിരിക്കുന്നത്. കോഴിക്കോട് സ്വദേശിയും ഗ്രാഫിക് ഡിസൈനറുമായ അന്വര് സാദത്താണ് ക്യാമ്പയിന് ഫേസ്ബുക്കില് തുടക്കമിട്ടത്. അധികം വൈകാതെ തന്നെ ക്യാമ്പയിന് ഏറ്റെടുത്ത് നിരവധി സിനിമാ-സാമൂഹിക-സാംസ്കാരിക രംഗത്തെ പ്രമുഖരും രംഗത്തുവന്നു.
രാമക്ഷേത്ര ശിലാസ്ഥാപനം 500 വര്ഷം നീണ്ട കാത്തിരിപ്പാണെന്നും രാജ്യത്തെ 130 കോടി ജനങ്ങളുടെ ആഗ്രഹമാണ് സഫലമായതെന്നും മോദി പ്രസ്താവിച്ചിരുന്നു. ബാബറി മസ്ജിദ് പൊളിച്ച സ്ഥലത്ത് രാമക്ഷേത്രം പണിയുന്നതില് അഭിമാനം കൊള്ളുന്നവരെന്ന് നരേന്ദ്രമോഡി പറഞ്ഞ ആ 130 കോടി ജനങ്ങളില് ഞാനില്ല എന്നാണ് ക്യാമ്പയിന് പോസ്റ്ററിലെ വാചകം.
സംവിധായകരായ ആഷിഖ് അബു, മിഥുന് മാനുവന് തോമസ്, സകരിയ, നടന് വിനയ് ഫോര്ട്ട്, നടി റിമ കല്ലിങ്കല്, ഗാനരചയിതാവ് ബികെ ഹരിനാരായണന്, ഗായകന് ഷഹബാസ് അമന്, നടി അഞ്ജലി അമീര്, സി.എസ് ചന്ദ്രിക, ഗായിക രശ്മി സതീഷ് തുടങ്ങിയവര് ക്യാംപെയിനിന്റെ ഭാഗമായിട്ടുണ്ട്. വാട്സ്ആപ്പ്, ഇന്സ്റ്റഗ്രാം സ്റ്റോറികളിലൂടെയും ഫേസ്ബുക്ക് പോസ്റ്റുകളിലൂടെയുമുള്ള ക്യാമ്പയിനില് രാഷ്ട്രീയ ഭേദമന്യേ നിരവധിപേര് പങ്കുചേര്ന്നു.
