ഇലന്തൂര് : ഇടപ്പരിയാരം വാർഡിൽ ആയുഷ് യോഗ ക്ലബ്ബ് രൂപീകരിച്ചു. വാർഡ് മെമ്പറും യോഗ ഇൻസ്ട്രക്ടറുമായ കെ.ജി. റെജി യോഗ ക്ലബ്ബ് ഉദ്ഘാടനം ചെയ്തു. എ.ഡി.എസ്. ചെയർപേഴ്സൺ ശ്രീകലാ റെജി അദ്ധ്യക്ഷത വഹിച്ചു. ഇലന്തൂർ ഹോമിയോ ആശുപത്രിയിലെ യോഗ ഇൻസ്ട്രക്ടർ ഡോ.കൃപ മെറിൻ സെബാസ്റ്റ്യൻ യോഗ പരിശീലനത്തിന് നേതൃത്വം നൽകി. പ്രിൽജ സുനിൽ, മഞ്ജു വിനോദ്, ലത എം.എസ്., സിന്ധു സുരേഷ്, വൽസല മോഹൻ, ശ്യാമള, രാധാമണി, ബിന്ദു ദിനേശ് തുടങ്ങിയവർ പ്രസംഗിച്ചു. 10 മുതൽ 11.30 വരെയാണ് യോഗസമയം.
ആരോഗ്യകരവും സമാധാനപരവുമായ ജീവിതത്തിനായി യോഗ, പ്രാണായാമം, ധ്യാനം, മുദ്ര എന്നിവ വളരെ അനിവാര്യമായി മാറിക്കൊണ്ടിരിക്കുന്നു. പ്രകൃതിദത്ത മാർഗങ്ങളായ ഇവയുടെ സ്ഥിരമായ അഭ്യാസത്തിലൂടെ ജീവിതത്തിന്റെ ഗുണമേന്മ ഉയർത്താൻ സഹായിക്കും. ജീവിത ശൈലി രോഗങ്ങൾ നിയന്ത്രിക്കാനും സമ്മർദ്ദം കുറയ്ക്കാനും ബുദ്ധിയും ഓർമ്മയും കാര്യശേഷിയും വർദ്ധിപ്പിക്കാനും ഏകാഗ്രതയ്ക്കും ആത്മ നിയന്ത്രണത്തിനും ആധുനിക സാങ്കേതിക വിദ്യയുടെ കാലത്തെ സങ്കീർണ്ണമായ പ്രശ്നങ്ങൾ പരിഹരിക്കുന്നതിനും സ്ഥിരമായ യോഗാഭ്യാസം ഉത്തമാണെന്നും സംഘാടകര് പറഞ്ഞു.
