രാമപുരം: കാര് നിയന്ത്രണംവിട്ട് മറിഞ്ഞ് പിഞ്ചു കുഞ്ഞ് മരിച്ചു. തീക്കോയി അത്യാലില് മനേഷ്- മെറിന് ദമ്പതികളുടെ ആറുമാസം പ്രായമുള്ള മകള് നെയ്മി ആന് ആണ് മരിച്ചത്. പാലാ – തൊടുപുഴ റോഡില് ഐങ്കൊമ്പിന് സമീപം ആറാം മൈലില് ഇന്നലെ രാവിലെ എട്ടരയോടെയാണ് അപകടമുണ്ടായത്. മെറിന്റെ പിതാവ് അടിമാലി ആനവിരട്ടി കൂനംപാറയില് വാവച്ചനാണ്(60) വാഹനമോടിച്ചിരുന്നതെന്നാണ് ലഭിക്കുന്ന വിവരം. അടിമാലിയില് നിന്നു തീക്കോയിലേയ്ക്ക് പോകവേയാണ് അപകടം നടന്നത്.
രണ്ടുപ്രാവശ്യം മറിഞ്ഞ കാര് നിര്ത്തിയിട്ടിരുന്ന ലോറിയില് ഇടിച്ചാണ് നിന്നത്. നാട്ടുകാര് ഉടന് കാറിലുണ്ടായിരുന്നവരെ പുറത്തെത്തിച്ച് ആശുപത്രിയിലെത്തിച്ചെങ്കിലും കുഞ്ഞിന്റെ ജീവന് രക്ഷിക്കാനായില്ല. മറ്റ് രണ്ടുപേര്ക്കും ഗുരുതരമായി പരിക്കേറ്റിട്ടുണ്ട്. ഇവര് സ്വകാര്യ ആശുപത്രിയില് ചികിത്സയിലാണ്.നെയ്മി ആനിന് ഒരു സഹോദരനുണ്ട്. പിതാവ് മനേഷ് വിദേശത്താണ്. രാമപുരം പോലീസ് സ്ഥലത്തെത്തി മേല്നടപടികള് സ്വീകരിച്ചു. മൃതദേഹം പോലീസ് നടപടികള്ക്ക് ശേഷം ആശുപത്രിയില് സൂക്ഷിച്ചിരിക്കുകയാണ്
