തൃശൂര് : അപകടത്തില്പ്പെട്ട വാഹനത്തില്നിന്ന് ലക്ഷങ്ങള് വിലവരുന്ന നിരോധിത പുകയില ഉല്പന്നങ്ങള് പിടിച്ച കേസിലെ പ്രതികളുടെ മുന്കൂര് ജാമ്യാപേക്ഷ തള്ളി. മലപ്പുറം വെളിയങ്കോട് പൂലാക്കല് വീട്ടില് സമീര് (41), വെളിയങ്കോട് പനക്കാട് വീട്ടില് മുഹമ്മദ് ജസീബ് (22) എന്നിവരുടെ മുന്കൂര് ജാമ്യാപേക്ഷയാണ് ജില്ല സെഷന്സ് ജഡ്ജ് തള്ളിയത്.
ജൂലൈ 29ന് പുലര്ച്ചെ മതിലകം സി.കെ വളവില് അരിയും പഞ്ചസാരയും കയറ്റിയ ലോറി മറിഞ്ഞിരുന്നു. രക്ഷാപ്രവര്ത്തനത്തിനെത്തിയ പോലീസ് പരിശോധനയിലാണ് ചാക്കുകള്ക്കടിയില് ഒളിപ്പിച്ച ഹാന്സ് അടക്കമുള്ള നിരോധിത പുകയില ഉല്പ്പന്നങ്ങള് കണ്ടെടുത്തത്. അപകടത്തിന് പിന്നാലെ ലോറിയിലുണ്ടായിരുന്നവര് രക്ഷപ്പെട്ടിരുന്നു. ഒളിവില് കഴിയുന്ന പ്രതികള് പ്രിന്സിപ്പല് സെഷന്സ് കോടതിയില് മുന്കൂര് ജാമ്യാപേക്ഷ നല്കുകയായിരുന്നു.
