ദുബായ് : യുഎഇയിലെ സ്വദേശി വനിതകളെ അധിക്ഷേപിക്കുന്ന രീതിയിൽ സമൂഹമാധ്യമത്തിൽ പ്രചാരണം നടത്തിയ വിദേശി വനിതയ്ക്കെതിരെ നാഷനൽ മീഡിയ അതോറിറ്റി നിയമനടപടി സ്വീകരിച്ചു. ചട്ടലംഘനം നടത്തിയ ഇവരുടെ പരസ്യ പെർമിറ്റ് മൂന്ന് മാസത്തേക്ക് സസ്പെൻഡ് ചെയ്തു. മാധ്യമ നിയന്ത്രണ നിയമത്തിനും അതിന്റെ അനുബന്ധ ചട്ടങ്ങൾക്കും വിരുദ്ധമായി മാധ്യമ ഉള്ളടക്ക മാനദണ്ഡങ്ങൾ ലംഘിച്ചാണ് യുവതി തന്റെ സമൂഹമാധ്യമ അക്കൗണ്ട് വഴി വിഡിയോ പ്രചരിപ്പിച്ചതെന്ന് അതോറിറ്റി വ്യക്തമാക്കി. നിയമനടപടികൾക്ക് പുറമെയാണ് ഇവർക്ക് അനുവദിച്ചിരുന്ന ഔദ്യോഗിക പരസ്യ പെർമിറ്റ് മൂന്ന് മാസത്തേക്ക് റദ്ദാക്കാൻ ഉത്തരവിട്ടത്.
എമിറാത്തി വനിതകളെ അധിക്ഷേപിക്കുന്നതിനോ, രാജ്യത്ത് അവരുടെ പദവിയെയും സംഭാവനകളെയും ചെറുതാക്കി കാണിക്കുന്നതിനോ ഉള്ള ഒരു ശ്രമവും അനുവദിക്കില്ലെന്ന് അതോറിറ്റി മുന്നറിയിപ്പ് നൽകി. സമൂഹമാധ്യമത്തിൽ ഉള്ളടക്കങ്ങൾ പങ്കുവയ്ക്കുമ്പോൾ ഉത്തരവാദിത്തം കാണിക്കണമെന്നും യുഎഇയുടെ സാമൂഹിക മൂല്യങ്ങളെയും ദേശീയ ഐഡന്റിറ്റിയെയും ബഹുമാനിക്കണമെന്നും അതോറിറ്റി ഉപയോക്താക്കളോട് അഭ്യർഥിച്ചു.
