കണ്ണൂര്‍: പാനൂരില്‍ പത്താം ക്ലാസുകാരന് നേരെ സദാചാര ഗുണ്ടായിസം നടത്തിയ സംഭവത്തില്‍ സംസ്ഥാന ബാലാവകാശ കമ്മീഷന്‍ കേസെടുത്തു. സഹപാഠിയായ പെണ്‍കുട്ടിക്കൊപ്പം നടന്നതിന് ഓട്ടോ ഡ്രൈവര്‍ ക്രൂരമായി മര്‍ദ്ദിക്കുകയായിരുന്നു. സംഭവത്തിന്റെ ദൃശ്യങ്ങള്‍ മാധ്യമങ്ങള്‍ പുറത്ത് വിടുകയും സോഷ്യല്‍ മീഡിയയില്‍ പ്രചരിക്കുകയും ചെയ്തിരുന്നു. ഇതിന് പിന്നാലെയാണ് സംസ്ഥാന ബാലാവകാശ കമ്മീഷന്‍ കേസെടുത്തത്. കമ്മീഷന്‍ പാനൂര്‍ പോലീസിനോട് റിപ്പോര്‍ട്ടും ആവശ്യപ്പെട്ടിട്ടുണ്ട്.
പെണ്‍കുട്ടിക്ക് ഒപ്പം നടക്കുന്നത് നിര്‍ത്തണം എന്ന് ആവശ്യപ്പെട്ട് തിങ്കളാഴ്ചയാണ് വിദ്യാര്‍ത്ഥിയെ മര്‍ദ്ദിച്ചത്. പാനൂര്‍ നഗരമധ്യത്തില്‍ വെച്ചാണ് വിദ്യാര്‍ത്ഥിയെ മര്‍ദ്ദിച്ചത്. മുത്താറിപീടികയിലെ ഓട്ടോ ഡ്രൈവര്‍ ജിനീഷാണ് മര്‍ദ്ദിച്ചത്. അടിയേറ്റ് വിദ്യാര്‍ത്ഥിയുടെ മുന്‍വരിയിലെ പല്ലിന് പരിക്കുണ്ട്. രക്ഷിതാക്കളുടെ പരാതിയെ തുടര്‍ന്ന് പാനൂര്‍ പോലീസ് അന്വേഷണം ആരംഭിച്ചു.
