റാന്നി : ശബരിമല തിരുവാഭരണ ഘോഷയാത്രയില്‍ തിരുവാഭരണം ഇറക്കി പൂജിച്ചിരുന്ന തറയില്‍ നിന്ന ആല്‍മരം പൂര്‍ണ്ണമായും മുറിച്ചു നീക്കി. റാന്നി വൈക്കം കുത്തുകല്ലുംപടിയില്‍ നിന്നിരുന്ന ആല്‍മരമാണ് മുറിച്ചുമാറ്റിയത്. പുനലൂര്‍-മൂവാറ്റുപുഴ സംസ്ഥാനപാതയുടെ നിര്‍മ്മാണവുമായി ബന്ധപ്പെട്ടാണ് മരം മുറിച്ചു നീക്കിയത്. മുറിച്ചു നീക്കിയ മരത്തിനു പകരം പുതിയ ആല്‍ത്തറ നിര്‍മ്മിച്ച് ആല്‍മരത്തൈയും നേരത്തെ സ്ഥാപിച്ചിരുന്നു. റോഡു നിര്‍മ്മാണ കമ്പനിയുടെ നേതൃത്വത്തിലാണ് പുതിയ ആല്‍ത്തറ നിര്‍മ്മിച്ചു നല്‍കിയത്.
റോഡിനു വീതി കൂട്ടിയപ്പോള്‍ ആല്‍മരം പുതിയ റോഡിനു മധ്യത്തിലായിരുന്നു. കൂടാതെ പഴക്കം ചെന്ന ആല്‍മരത്തിന്‍റെ ശിഖരം അടുത്ത സമയത്ത് ശക്തമായ കാറ്റിലും മഴയിലും ഒടിഞ്ഞു വീണിരുന്നു. ഒരാഴ്ച മുമ്പ് മരം മുറിക്കാന്‍ തുടങ്ങിയിരുന്നെങ്കിലും തൊഴിലാളിയുടെ കാലിന് മുറിവേറ്റു താഴെ വീണിരുന്നു. തുടര്‍ന്നു കുറച്ചുദിവസം നിര്‍ത്തിവെച്ചിരുന്ന ജോലികളാണ് ഇന്നലെ പൂര്‍ത്തിയായത്.
