നെടുംകുന്നം : ബാങ്കില് പണയംവെച്ച സ്വര്ണാഭരണങ്ങള് തിരികെ എടുത്തപ്പോള് തൂക്കം കുറഞ്ഞതായി പരാതി. നെടുംകുന്നം പുന്നവേലി ഇടക്കല്ലില് ബിജോ എബ്രഹാമാണ് നെടുംകുന്നം തെക്ക് 1271ാം നമ്പര് സഹകരണ ബാങ്കിനെതിരെ പരാതി നല്കിയത്.
ബിജോയുടെ പിതാവ് ഇ.കെ. എബ്രഹാമിന്റെ ചികിത്സ ആവശ്യത്തിനായി 2019 ആഗസ്റ്റ് ആറിന് ബാങ്കില് 83 ഗ്രാം സ്വര്ണ ഉരുപ്പടികള് പണയപ്പെടുത്തി 1,70,000 രൂപ എടുത്തിരുന്നു. ചികിത്സയില് കഴിയവെ എബ്രഹാം മരണപ്പെട്ടു. തുടര്ന്ന് സ്വര്ണപ്പണയവും ചിട്ടിയുമടക്കം 2020 മേയ് അഞ്ചിന് ബിജോയുടെ പേരിലേക്ക് മാറ്റി. 2021 മാര്ച്ച് മൂന്നിന് പണയത്തുകയും പലിശയും മറ്റ് ബാധ്യതകളുമടക്കം 2,18,652 രൂപ അടച്ച് ബിജോ ബാങ്കില്നിന്നു് പണയമെടുത്തു. ആഭരണങ്ങള് വില്ക്കാനായി തൂക്കിയപ്പോള് 52.9 ഗ്രാം മാത്രമാണ് ഉള്ളത്.
20 മിനിറ്റിനുള്ളില് ബിജോ ബാങ്കിലെത്തി പ്രശ്നം അധികൃതരോട് പറഞ്ഞെങ്കിലും ഇനി ഉത്തരവാദിത്തം ഏറ്റെടുക്കില്ലെന്ന് അധികൃതര് അറിയിച്ചു. പണയംവെച്ച ആഭരണങ്ങളുടെ എണ്ണം കൃത്യമാണെന്നും എന്നാല് തൂക്കത്തില് മാത്രമാണ് വ്യത്യാസമെന്നും ബിജോ ആരോപിക്കുന്നു. സംഭവത്തില് സെക്രട്ടറിയടക്കമുള്ളവര്ക്ക് പരാതി നല്കിയിട്ടും നടപടി സ്വീകരിച്ചില്ലെന്നാണ് ആരോപണം. എന്നാല് സ്വര്ണത്തിന്റെ തൂക്കം പരിശോധിക്കേണ്ടത് ഉടമയുടെ ഉത്തരവാദിത്തമാണെന്നും ബാങ്കില്നിന്നുപോയ ശേഷം പിന്നീട് പരാതിയുമായി എത്തിയാല് തങ്ങള്ക്ക് ഒന്നുംചെയ്യാന് കഴിയില്ലെന്നും സെക്രട്ടറി പറഞ്ഞു. സംഭവത്തില് ബിജോ കറുകച്ചാല് പോലീസിനും മനുഷ്യാവകാശ കമ്മീഷനിലും പരാതി നല്കി.
