തിരുവനന്തപുരം : സംസ്ഥാനത്ത് ബാറുകള് ഉടന് തുറക്കേണ്ടെന്ന് തീരുമാനം. മുഖ്യമന്ത്രി പിണറായി വിജയന് വിളിച്ചുചേര്ത്ത ഉന്നതതല യോഗത്തിലാണ് തീരുമാനം. കൊവിഡ് വ്യാപനം രൂക്ഷമായ സാഹചര്യത്തിലാണ് ബാറുകളും ബിയര്-വൈന് പാര്ലറുകളും തുറക്കേണ്ടെന്ന് തീരുമാനിച്ചത്.
സംസ്ഥാനത്ത് കൊവിഡ് വ്യാപനം രൂക്ഷമായ സ്ഥിതിയിലാണെന്ന് ആരോഗ്യവകുപ്പ് പ്രിന്സിപ്പല് സെക്രട്ടറി രാജന് ഖോബ്രഗഡെ യോഗത്തില് ചൂണ്ടിക്കാട്ടി. ഇതില് കൂടുതലും സമ്പര്ക്ക വ്യാപനം വഴിയുള്ളതാണ്. ഈ ഘട്ടത്തില് ബാറുകള് തുറക്കുന്നത് കൂടുതല് പ്രശ്നങ്ങള് സൃഷ്ടിച്ചേക്കാമെന്നും ആരോഗ്യവകുപ്പ് വിലയിരുത്തി. തുടര്ന്നാണ് ബാറുകള് ഉടന് തുറക്കേണ്ടെന്ന തീരുമാനം സ്വീകരിച്ചത്.
