കോട്ടയം : ഇന്നു പുലര്ച്ചെ കാലം ചെയ്ത മലങ്കര ഓര്ത്തഡോക്സ് സഭയുടെ പരമാധ്യക്ഷന് ബസേലിയോസ് മാര്ത്തോമ്മ പൗലോസ് ദ്വിതീയന് കാതോലിക്ക ബാവയുടെ കബറടക്കം ചൊവ്വാഴ്ച. 75 വയസായിരുന്നു. അര്ബുദബാധിതനായി പരുമല ആശുപത്രിയില് ചികിത്സയിലിരിക്കെ ഇന്നു പുലര്ച്ചെ 2.35നായിരുന്നു വിയോഗം.
കബറടക്ക ശുശ്രൂഷ ചൊവ്വാഴ്ച ഉച്ചകഴിഞ്ഞ് മൂന്നിനു കോട്ടയം ദേവലോകം അരമനയില്. മലങ്കര ഓര്ത്തഡോക്സ് സഭയില് പരിശുദ്ധ പരുമല മാര് ഗ്രിഗോറിയോസ് തിരുമേനിക്കു ശേഷം മെത്രാന് സ്ഥാനത്തേക്കു തെരഞ്ഞെടുക്കപ്പെട്ട ഏറ്റവും പ്രായം കുറഞ്ഞ വ്യക്തിയും കുന്നംകുളത്തുനിന്നുള്ള മൂന്നാമത്തെ മലങ്കര മെത്രാപ്പോലീത്തയുമായിരുന്നു ബസേലിയോസ് മാര്ത്തോമ്മ പൗലോസ് ദ്വിതീയന് കാതോലിക്ക ബാവ.
കാലം ചെയ്ത കാതോലിക്കാ ബാവയുടെ ഭൗതിക ശരീരം പരുമല ആശുപത്രിയില്നിന്നു പരുമല പള്ളിയിലേക്കു കൊണ്ടുപോയി. രാവിലെ പള്ളിയില് എത്തിച്ചേര്ന്ന ഭൗതിക ശരീരത്തില് വിശ്വാസികള് ആദരാജ്ഞലികള് അര്പ്പിച്ചു. ഡോ. ഗീവര്ഗീസ് മാര് യൂലിയോസ് മെത്രാപ്പോലീത്താ വിശുദ്ധ കുര്ബാന അര്പ്പിച്ചു. രാത്രി ഏഴുവരെ ഭൗതിക ശരീരം പരുമല പള്ളിയില് പൊതുദര്ശനത്തിന് വെയ്ക്കും.
തുടര്ന്നു വിടവാങ്ങല് പ്രാര്ഥനയ്ക്കു ശേഷം എട്ടോടെ ഭൗതിക ശരീരം വിലാപയാത്രയായി കാവുംഭാഗം – മുത്തൂര് – ചങ്ങനാശേരി വഴി ദേവലോകം അരമനയില് എത്തിക്കും. രാത്രി ഒന്പതിനു കോട്ടയം ദേവലോകം കാതോലിക്കേറ്റ് അരമനയില് എത്തിച്ചേരും. ബാവാ തിരുമേനിയുടെ ഭൗതിക ശരീരം ദേവലോകം അരമന ചാപ്പലില് പ്രാര്ഥനയ്ക്കു ശേഷം പൊതുദര്ശനത്തിനുവെയ്ക്കും.
ചൊവ്വാഴ്ച രാവിലെ കാതോലിക്കേറ്റ് അരമന ചാപ്പലിലെ വിശുദ്ധ കുര്ബാനയ്ക്കു ശേഷം എട്ടിനു കോവിഡ് പ്രോട്ടോക്കോള് അനുസരിച്ചുള്ള പൊതു ദര്ശനത്തിനായി അരമന കോംപൗണ്ടില് ക്രമീകരിച്ചിട്ടുള്ള പന്തലിലേക്കു ഭൗതിക ശരീരം മാറ്റും.
കബറടക്ക ശുശ്രൂഷയുടെ സമാപനത്തിന്റെ ഭാഗമായ വിടവാങ്ങല് ശുശ്രൂഷയ്ക്കായി ഉച്ചകഴിഞ്ഞു മൂന്നിനു ഭൗതിക ശരീരം ദേവലോകം കാതോലിക്കേറ്റ് അരമന ചാപ്പലിന്റെ മദ്ബഹായിലേക്കു കൊണ്ടു വരുന്നതും ശുശ്രൂഷകള് പൂര്ത്തീകരിച്ച് അഞ്ചിനു ദേവലോകം കാതോലിക്കേറ്റ് അരമനയുടെ ചാപ്പലിനോടു ചേര്ന്നുള്ള കാതോലിക്കാ ബാവാമാരുടെ കബറിടത്തിനോടു ചേര്ന്നുള്ള കബറിടത്തില് സംസ്കാരം നടക്കും.