കൊച്ചി : അഞ്ച് വര്ഷത്തെ ഇടവേളയ്ക്ക് ശേഷം ഭാവന വീണ്ടും മലയാള സിനിമയിലേക്കെത്തുന്നു. നവാഗതനായ ആദില് മൈമൂനത്ത് അശ്റഫ് സംവിധാനം ചെയ്യുന്ന ‘ന്റിക്കാക്കാക്കൊരു പ്രേമണ്ടാര്ന്ന്’ എന്ന ചിത്രത്തിലൂടെയാണ് താരത്തിന്റെ തിരിച്ചുവരവ്. ചിത്രത്തിന്റെ ഫസ്റ്റ് ലുക് പോസ്റ്റര് പുറത്തിറങ്ങി. നിര്മ്മാതാവ് റെനിഷ് അബ്ദുല് ഖാദറും ഭാവനയും സമൂഹ മാധ്യമങ്ങളിലൂടെ പോസ്റ്റര് പങ്കുവച്ചിട്ടുണ്ട്. ശറഫുദ്ധീന് ആണ് ചിത്രത്തിലെ നായകന്. 2017ല് പുറത്തിറങ്ങിയ ആദം ജോണ് ആണ് ഭാവന അവസാനമായി അഭിനയിച്ച മലയാള ചിത്രം.
തനിക്ക് മലയാളത്തില് അവസരങ്ങള് നിഷേധിക്കപ്പെട്ടിരുന്നുവെന്ന് ഭാവന നേരത്തെ ഒരു അഭിമുഖത്തില് വ്യക്തമാക്കിയിരുന്നു. ഇതേ അഭിമുഖത്തിലാണ് താന് മലയാളത്തിലേക്ക് വീണ്ടും തിരിച്ചെത്തുകയാണെന്ന സൂചനയും താരം നല്കിയത്. ചിത്രത്തിന്റെ കഥയും എഡിറ്റിങ്ങും ആദിലിന്റേതാണ്. തിരക്കഥയില് കൂടെ പ്രവര്ത്തിച്ചട്ടുള്ള വിവേക് ഭരതനാണ് സംഭാഷണം എഴുതിയിരിക്കുന്നത്.
