കൊല്ക്കത്ത: പശ്ചിമബംഗാളില് ഇന്ന് ഏഴാം ഘട്ട തെരഞ്ഞെടുപ്പ് ആരംഭിച്ചു. അഞ്ച് ജില്ലകളിലെ 34 മണ്ഡലങ്ങളിലേക്കുള്ള തെരഞ്ഞെടുപ്പാണ് ഇന്ന് നടക്കുന്നത്. 268 സ്ഥാനാര്ത്ഥികളാണ് ഏഴാം ഘട്ടത്തില് ജനവിധി തേടുന്നത്. ഇതില് 31 സ്ഥാനാര്ത്ഥികള് സ്ത്രീകളാണ്.
കോവിഡ് വൈറസ് വ്യാപനത്തിന്റെ പശ്ചാത്തലത്തില് കര്ശന നിയന്ത്രണങ്ങള് ഏര്പ്പെടുത്തിയ ശേഷമുള്ള ആദ്യ തെരഞ്ഞെടുപ്പാണിത്. കോവിഡ് മാനദണ്ഡങ്ങള് പാലിച്ച് എല്ലാവരും തങ്ങളുടെ സമ്മതിദാനവകാശം വിനിയോഗിക്കണമെന്ന് പ്രധാനമന്ത്രി നരേന്ദ്ര മോദി നിര്ദ്ദേശം നല്കിയിട്ടുണ്ട്.
ബംഗാളില് തെരഞ്ഞെടുപ്പിനിടെ വ്യാപക അക്രമം ഉണ്ടായതിനാല് അതീവ ജാഗ്രതയിലാണ് തെരഞ്ഞെടുപ്പ് കേന്ദ്രങ്ങള്. 796 കമ്പിനി കേന്ദ്ര സേനയെ സുരക്ഷയ്ക്കായി നിയോഗിച്ചിട്ടുണ്ട്. എട്ടു ഘട്ടങ്ങളായാണ് ബംഗാളില് നിയമസഭാ തെരഞ്ഞെടുപ്പ് നടക്കുന്നത്. ഏപ്രില് 29 നാണ് അവസാന ഘട്ട തെരഞ്ഞെടുപ്പ് നിശ്ചയിച്ചിരിക്കുന്നത്. മെയ് രണ്ടിനാണ് വോട്ടെണ്ണല്. സ്ഥാനാര്ത്ഥികള് മരിച്ച സംസേര്ഗഞ്ച്, ജംഗിപൂര് എന്നീ മണ്ഡലങ്ങളില് മെയ് 16 നായിരിക്കും വോട്ടെടുപ്പ് നടക്കുക.
