ബെംഗളൂരു: സുഡാനില് നിന്ന് വന്ന മലയാളികള് ബംഗളുരു വിമാനത്താവളത്തില് കുടുങ്ങി. യെല്ലോ ഫീവര് പ്രതിരോധ വാക്സിന് കാര്ഡ് ഇല്ലെങ്കില് മലയാളികളെ പുറത്ത് ഇറക്കി വിടില്ലെന്നാണ് എയര്പോര്ട്ട് അധികൃതര് പറയുന്നത്. അതല്ലെങ്കില് സ്വന്തം ചിലവില് അഞ്ച് ദിവസം ക്വാറന്റീനില് പോകണമെന്നും അധികൃതര് ആവശ്യപ്പെടുന്നു. 25 മലയാളികള് ആണ് ബെംഗളൂരുവില് കുടുങ്ങിയിരിക്കുന്നത്. എന്നാല് ഇനി ബെംഗളുരുവില് ക്വാറന്റീന് ചെലവ് കൂടി താങ്ങാന് ശേഷി ഇല്ലെന്നാണ് യാത്രക്കാര് പറയുന്നത്.
അതേസമയം, മുംബൈ അടക്കം ഉള്ള വിമാനത്താവളങ്ങളില് എത്തിയവര് വാക്സിന് സര്ട്ടിഫിക്കറ്റ് നിബന്ധന ഇല്ലാതെ നാട്ടിലേക്ക് മടങ്ങിയിരുന്നുവെന്ന് സര്ക്കാറിന്റെ പ്രത്യേക പ്രതിനിധി കെ വി തോമസ് പ്രതികരിച്ചു. സുഡാനില്നിന്ന് ഓപറേഷന് കാവേരിയിലൂടെ 1,100 പേരെ രക്ഷപ്പെടുത്തിയെന്ന് മന്ത്രി വി. മുരളീധരന് പറഞ്ഞു. വ്യാഴാഴ്ച രാവിലെവരെ 1,100 ഇന്ത്യക്കാരെ ജിദ്ദയിലെത്തിച്ചിട്ടുണ്ട്. ഇതില് നിന്ന് 606 പേര് ഇതിനകം ഇന്ത്യയില് എത്തി. ഇതില് 27 മലയാളികളും ഉള്പ്പെടും. ജിദ്ദയില് എത്തിയ ബാക്കിയുള്ളവരെ വിമാനങ്ങളുടെ ലഭ്യത അനുസരിച്ച് നാട്ടിലെത്തിക്കും.
