പന്തളം: വാഴക്കുല കയറ്റി വന്ന ലോറി നിയന്ത്രണം വിട്ട് ഇടിച്ചതിനെ തുടര്ന്ന് ബൈക്ക് യാത്രികന് മരിച്ചു. പന്തളം ജംഗ്ഷനും മണികണ്ഠന് ആല്ത്തറക്കും ഇടയിലായി ഇന്ന് വൈകിട്ട് 4 മണിയോടെയാണ് അപകടം നടന്നത്. അപകടത്തില് കൊല്ലം പവിത്രേശ്വരം സ്വദേശി പ്രത്യാശ് ആണ് മരണപ്പെട്ടത്. വാഴക്കുല കയറ്റി വന്ന ലോറി ബൈക്ക് യാത്രികനെ ഇടിച്ചതിന് ശേഷം സമീപത്തുണ്ടായിരുന്ന കാറുകളിലും ഇലക്ട്രിക് പോസ്റ്റിലും ഇടിച്ച് മറിയുകയായിരുന്നു. അപകടത്തില് നിരവധി കാറുകളും തകര്ന്നു.
ഇടിയുടെ ശക്തിയില് പ്രത്യാശ് ധരിച്ചിരുന്ന ഹെല്മെറ്റ് ചിന്നി ചിതറുകയും ചെയ്തു. ഇലക്ട്രിക് പോസ്റ്റ് ഇളകി റോഡില് വീഴുകയും ചെയ്തു. ഈ സമയം ലോറി അപകടത്തില്പ്പെട്ട ഭാഗത്ത് കൂടുതല് ആളുകള് ഇല്ലാതിരുന്നതിനാല് വലിയ ദുരന്തം ഒഴിവാകുകയായിരുന്നു. അപകടത്തെ തുടര്ന്ന് മണിക്കൂറുകളോളം ഗതാഗതം തടസപ്പെട്ടു. പന്തളം പോലീസും അടൂര് ഫയര് ഫോഴ്സും നാട്ടുകാരും ചേര്ന്ന് രക്ഷാ പ്രവര്ത്തനം നടത്തി ഗതാഗതം പുനസ്ഥാപിക്കുകയായിരുന്നു. മൃതദേഹം പോസ്റ്റ് മോര്ട്ടം നടപടികള്ക്കായി മോര്ച്ചറിയിലേക്ക് മാറ്റി.
