തിരുവനന്തപുരം : രാജ്യത്തെ സ്വർണ വിപണിയിലും ഹാൾമാർക്കിംഗ് രംഗത്തും സുതാര്യത ഉറപ്പാക്കാൻ ലക്ഷ്യമിട്ട് ബ്യൂറോ ഓഫ് ഇന്ത്യൻ സ്റ്റാൻഡേർഡ്സ് (BIS) പുതിയ പരിഷ്കാരങ്ങൾ നടപ്പിലാക്കുന്നു. ജൂൺ 8 തിങ്കളാഴ്ച മുതൽ ഹാൾമാർക്ക് ചെയ്യുന്ന ഓരോ സ്വർണാഭരണത്തിന്റെയും ചിത്രവും കൃത്യമായ തൂക്കവും ബി.ഐ.എസ് പോർട്ടലിൽ നിർബന്ധമായും അപ്ലോഡ് ചെയ്യണം. വ്യാജ ഹാൾമാർക്കിംഗും തട്ടിപ്പുകളും പൂർണമായി തടയുന്നതിന്റെ ഭാഗമായാണ് കേന്ദ്ര സർക്കാരിന്റെ ഈ സുപ്രധാന നീക്കം. നിലവിൽ ‘ബി.ഐ.എസ് കെയർ’ (BIS Care) ആപ്പിൽ ആറക്ക എച്ച്.യു.ഐ.ഡി (HUID) നമ്പർ പരിശോധിച്ചാൽ ജ്വല്ലറിയുടെ വിവരങ്ങളും ആഭരണത്തിന്റെ ഇനവും പരിശുദ്ധിയും മാത്രമാണ് ലഭ്യമായിരുന്നത്. എന്നാൽ പുതിയ നിയമം പ്രാബല്യത്തിൽ വരുന്നതോടെ, ഉപഭോക്താക്കൾക്ക് തങ്ങൾ വാങ്ങുന്ന ആഭരണത്തിന്റെ യഥാർത്ഥ ചിത്രവും തൂക്കവും ആപ്പിലൂടെ നേരിട്ട് ഒത്തുനോക്കി ബോധ്യപ്പെടാനാകും.
പരിഷ്കാരങ്ങളുടെ രണ്ടാം ഘട്ടമെന്നോണം ജൂൺ 15 മുതൽ ‘മൈക്രോബാലൻസ് ഓട്ടോമാറ്റിക് ഇന്റഗ്രേഷൻ’ സംവിധാനം കർശനമാക്കും. ഇതോടെ ആഭരണങ്ങളുടെ ഡിസൈനൊപ്പം ഒരു മില്ലിഗ്രാം വരെയുള്ള കൃത്യമായ തൂക്കവും ഡിജിറ്റലായി രേഖപ്പെടുത്താൻ സാധിക്കും. രാജ്യത്തെ തിരഞ്ഞെടുക്കപ്പെട്ട 25 ഹാൾമാർക്കിംഗ് കേന്ദ്രങ്ങളിലാണ് പൈലറ്റ് അടിസ്ഥാനത്തിൽ ഈ പദ്ധതി ആദ്യ ഘട്ടത്തിൽ നടപ്പാക്കുന്നത്. ഈ സംവിധാനം നിലവിൽ വരുന്നതോടെ, ഒരു ആഭരണത്തിന്റെ എച്ച്.യു.ഐ.ഡി കോഡ് വ്യാജമായി നിർമ്മിച്ച് മറ്റൊരു ആഭരണത്തിനായി ഉപയോഗിക്കുന്നത് പൂർണമായും തടയാനാകും.
