ദില്ലി : രാജ്യത്തെ ഇന്ധനവില വര്ദ്ധനവിന് കാരണം താലിബാന് അഫ്ഗാനില് ഭരണം പിടിച്ചതാണെന്ന പുതിയ കാരണം കണ്ടെത്തി ബി ജെ പി എം എല് എ അരവിന്ദ് ബെല്ലാഡ്. ‘അഫ്ഗാനിലെ താലിബാന് പ്രതിസന്ധി കാരണം ക്രൂഡ് ഓയില് വിതരണം നടക്കുന്നില്ല. അത് കാരണം പാചകവാതകം, പെട്രോള്, ഡീസല് എന്നിവയുടെ വില വര്ധിക്കുകയാണ്. വോട്ടര്മാര്ക്ക് ഇത് മനസിലാക്കാനുള്ള പക്വതയുണ്ട്,’ അരവിന്ദ് പറഞ്ഞു.
ഒരു ലിറ്റര് പെട്രോളിന് രാജ്യത്ത് 100 രൂപ കടന്നിരിക്കുകയാണ്. ഇന്ധന വില വര്ധനവ് വഴി കേന്ദ്രസര്ക്കാരിന് 88 ശതമാനം അധികവരുമാനമാണ് ലഭിക്കുന്നത്. ഇക്കഴിഞ്ഞ സാമ്പത്തിക വര്ഷത്തില് 3.35 ലക്ഷം കോടി രൂപയാണ് ഇന്ധനനികുതി വര്ധനവിലൂടെ കേന്ദ്രസര്ക്കാരിന് ലഭിച്ചത്. പെട്രോളിന്റെ എക്സൈസ് തീരുവ കഴിഞ്ഞ വര്ഷം 19.98 ല് നിന്ന് 32.9 യിലേക്കാണ് വര്ധിപ്പിച്ചത്. ഡീസലിനാകട്ടെ ഇത് 15.83 ല് നിന്ന് 31.8 രൂപയാക്കി. ഇതാണ് കേന്ദ്ര സര്ക്കാരിന് റെക്കോഡ് വരുമാനം കൊണ്ടുവന്നത്.
ക്രൂഡ് ഓയില് ഇറക്കുമതി ചെയ്യുന്ന ലോകത്തെ മൂന്നാമത്തെ ഏറ്റവും വലിയ രാജ്യമാണ് ഇന്ത്യ. എന്നാല് ഇന്ത്യ അഫ്ഗാനില് നിന്നല്ല ക്രൂഡ് ഓയില് വാങ്ങുന്നത്. ഇറാഖ്, സൗദി അറേബ്യ, യു എ ഇ, നൈജീരിയ, അമേരിക്ക, കാനഡ എന്നീ രാജ്യങ്ങളില് നിന്നാണ് ഇന്ത്യ വലിയ അളവില് ക്രൂഡ് ഓയില് വാങ്ങിക്കുന്നത്.
