തെലങ്കാന: നവംബര് 3ന് നിര്ണ്ണായകമായ ഉപതിരഞ്ഞെടുപ്പ് നടക്കാനിരിക്കുന്ന തെലങ്കാനയിലെ മുനുഗോഡില് അജ്ഞാതര് കുഴിച്ച കുഴിമാടത്തില് ബിജെപി ദേശീയ അധ്യക്ഷന് ജെപി നദ്ദയെ പ്രതീകാത്മകമായി സംസ്കരിച്ചു. നിര്ദിഷ്ട റീജിയണല് ഫ്ലൂറൈഡ് ലഘൂകരണ ഗവേഷണ കേന്ദ്രം സ്ഥാപിക്കുന്നതിലെ കാലതാമസത്തിനെതിരായ പ്രതിഷേധമാണ് ഈ ശവക്കുഴിയും സംസ്കാരവും. തെലങ്കാനയിലെ നല്ഗൊണ്ട ജില്ലയിലെ ഗ്രാമത്തിലാണ് വിവാദമായ പ്രതിഷേധം അരങ്ങേറിയത്.
അടുത്ത വര്ഷം നടക്കാനിരിക്കുന്ന നിയമസഭ തിരഞ്ഞെടുപ്പിന് മുമ്പുള്ള ഉപതിരഞ്ഞെടുപ്പ് സംസ്ഥാനത്തെ പാര്ട്ടികള്ക്ക് അഗ്നിപരീക്ഷയാണ്. റീജിയണല് ഫ്ലൂറൈഡ് മിറ്റിഗേഷന് ആന്ഡ് റിസര്ച്ച് സെന്റര്, ഇന്നൊവേഷന് ആന്ഡ് റിസര്ച്ച് പ്രോഗ്രാം, 100 കോടി രൂപ ചെലവില് സ്ഥാപിക്കാന് നിര്ദ്ദേശിക്കുകയും നാഷണല് ഇന്സ്റ്റിറ്റ്യൂട്ട് ഓഫ് ന്യൂട്രീഷന് വര്ഷങ്ങള്ക്ക് മുമ്പ് കൈമാറുകയും ചെയ്തിരുന്നു. എന്നാല്, പണി ഇതുവരെ പൂര്ത്തീകരിക്കാന് കഴിഞ്ഞിട്ടില്ല.
ഫ്ലൂറൈഡിന്റെ പ്രഭാവം കുറയ്ക്കുക, ഇരകളുടെ ചികിത്സ, ഭാവി തലമുറകളില് ഫ്ലൂറൈഡിന്റെ സ്വാധീനം പരിശോധിക്കല് തുടങ്ങി വിവിധ വിഷയങ്ങളില് ഗവേഷണം നടത്തുകയാണ് കേന്ദ്രസ്ഥാപനത്തിലൂടെ സര്ക്കാര് ലക്ഷ്യമിടുന്നത്. ശവക്കുഴി പ്രതിഷേധത്തില് ഭരണകക്ഷിയായ ടിആര്എസിനെതിരെ ബിജെപി ആഞ്ഞടിച്ചു. സംഭവം രാഷ്ട്രീയ അധഃപതനത്തെ കാണിക്കുന്നതാണെന്ന് കേന്ദ്രമന്ത്രി സ്മൃതി ഇറാനി പറഞ്ഞു. ‘വിനാശ കാലേ വിപരീത ബുദ്ധി (വിധി അടുക്കുമ്പോള് മനസ്സ് വികൃതമായി പ്രവര്ത്തിക്കുന്നു)”- കേന്ദ്രമന്ത്രി ട്വീറ്റ് ചെയ്തു.
