കൊല്ക്കത്ത : ബി.ജെ.പി യുടെ സംഘടനാ പ്രവര്ത്തനത്തെ രൂക്ഷമായി വിമര്ശിച്ച മുതിര്ന്ന നേതാവ് തഥാഗത റോയിക്ക് മറുപടിയുമായി ദേശീയ ഉപാധ്യക്ഷന് ദിലീപ് ഘോഷ്. തഥാഗത റോയി യാതൊരു പാര്ട്ടി പദവിയും നിലവില് വഹിക്കുന്നില്ലെന്നും അദ്ദേഹത്തിന്റെ പരാമര്ശങ്ങള് പാര്ട്ടിക്ക് പ്രശ്നമുണ്ടാക്കില്ലെന്നും ദിലീപ് ഘോഷ് പറഞ്ഞു. ‘ഞങ്ങളുടെ പാര്ട്ടിക്ക് ഇതൊരു പ്രശ്നമല്ല. ഒരു പക്ഷെ മാധ്യമങ്ങള്ക്ക് പ്രശ്നമാകാം. അദ്ദേഹം പാര്ട്ടിയില് യാതൊരു സ്ഥാനവും വഹിക്കുന്നില്ല.’ ബി.ജെ.പി പശ്ചിമ ബംഗാള് ഘടകത്തില് സംഘടനാപരമായ മാറ്റങ്ങള് ഉടന് ഉണ്ടാകുമെന്നും ഘോഷ് വ്യക്തമാക്കി.
ദേശീയ അധ്യക്ഷനും സംഘടനാ ചുമതലയുള്ള ജനറല് സെക്രട്ടറിയും സംസ്ഥാന ഭാരവാഹികളുമായി ചര്ച്ച നടത്തുമെന്നും അതിന്റെ അടിസ്ഥാനത്തില് സംഘടനയില് മാറ്റങ്ങളുണ്ടാകുമെന്നും പശ്ചിമ ബംഗാള് മുന് അധ്യക്ഷനായിരുന്ന ദിലീപ് ഘോഷ് വ്യക്തമാക്കി. ബി.ജെ.പി ബംഗാള് ഘടകത്തിന്റെ താല്കാലിക ചുമതല വഹിക്കുന്ന കൈലാഷ് വിജയ വാര്ഗിക്കെതിരെയും തഥാഗത റോയി വിമര്ശനം ഉയര്ത്തിയിരുന്നു.
