അമേരിക്ക : പ്രശസ്ത അമേരിക്കന് നടന് ടോം സൈസ്മോര് (61) അന്തരിച്ചു. സേവിങ് പ്രൈവറ്റ് റയാന്, ബ്ലാക്ക് ഹോക്ക് ഡൗണ് തുടങ്ങിയ ചിത്രങ്ങളിലൂടെ പ്രശസ്തനാണ്. മൂന്ന് പതിറ്റാണ്ടിലേറെ നീണ്ടുനിന്ന അഭിനയ ജീവിതമായിരുന്നു സൈസ്മോറിന്റേത്. തലച്ചോറിലെ അസുഖത്തേത്തുടര്ന്ന് സൈസ്മോറിനെ ലോസ് ആഞ്ജലിസിലെ ആശുപത്രിയില് പ്രവേശിപ്പിച്ചിരുന്നു. പക്ഷാഘാതത്തേത്തുടര്ന്നാണ് ഈ രോഗാവസ്ഥയുണ്ടായതെന്ന് അദ്ദേഹത്തിന്റെ മാനേജര് ചാള്സ് ലാഗോ പറഞ്ഞു.
തോമസ് എഡ്വാര്ഡ് സൈസ്മോര് ജൂനിയര് എന്നാണ് യഥാര്ത്ഥ പേര്. 1961 നവംബര് 29-ന് ഡിട്രോയിറ്റിലാണ് ജനനം. ഒലിവര് സ്റ്റോണ് സംവിധാനം ചെയ്ത് 1994-ല് പുറത്തിറങ്ങിയ നാച്ചുറല് ബോണ് കില്ലേഴ്സ് എന്ന ചിത്രത്തിലെ ക്രൂരനായ ഡിറ്റക്ടീവിന്റെ വേഷം അദ്ദേഹത്തിന് ഏറെ പ്രശംസ നേടിക്കൊടുത്തു. വൂഡി ഹാറിള്സണും ജൂലിയറ്റ് ലൂയിസുമായിരുന്നു ചിത്രത്തിലെ മറ്റ് താരങ്ങള്. തൊട്ടടുത്ത വര്ഷം പുറത്തിറങ്ങിയ ‘ഹീറ്റ്’ എന്ന ചിത്രത്തില് അല് പച്ചിനോയ്ക്കും റോബര്ട്ട് ഡി നീറോയ്ക്കുമൊപ്പം തുല്യപ്രാധാന്യമുള്ള വേഷത്തില് അദ്ദേഹമെത്തി. 1998-ല് സ്റ്റീവന് സ്പീല്ബര്ഗ് സംവിധാനം ചെയ്ത ടോം ഹാങ്ക്സ് ചിത്രം സേവിങ് പ്രൈവറ്റ് റയാനിലെ വേഷം അദ്ദേഹത്തിന് ഏറെ കയ്യടികള് നേടിക്കൊടുത്തു. സിനിമകള്ക്ക് പുറമേ ക്രാഷ്, ഹവായ് ഫൈവ്-ഓ, ഷൂട്ടര്, ട്വിന് പീക്സ് തുടങ്ങിയ ടെലിവിഷന് ഷോകളിലും സൈസ്മോര് ഭാഗമായി.
