കോഴിക്കോട്: സന്നദ്ധ രക്തദാന രംഗത്തും ജീവകാരുണ്യ സാമൂഹ്യസേവന മേഖലയിലും ബ്ലഡ് ഡോണേർസ് കേരള (ബി.ഡി.കെ) സംസ്ഥാനത്തിനകത്തും പുറത്തും നടത്തുന്ന പ്രവർത്തനങ്ങൾ ഏറെ ശ്ലാഘനീയമാണെന്ന് അഡ്വ.കെ.ജയന്ത് എം.എൽ.എ പറഞ്ഞു. കോഴിക്കോട് മെയ്ത്ര ഹോസ്പിറ്റൽ കമ്യൂണിറ്റി സെന്റർ ഓഡിറ്റോറിയത്തിൽ വെച്ച് നടന്ന ബ്ലഡ് ഡോണേർസ് കേരളയുടെ സംസ്ഥാന ജനറൽ ബോഡി യോഗം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. യുവാക്കൾ രക്തദാന രംഗത്ത് കൂടുതൽ സജീവമായാൽ രക്തദൗർലഭ്യം മൂലമുള്ള ജീവനഷ്ടങ്ങൾ പൂർണ്ണമായും ഒഴിവാക്കാൻ സാധിക്കുമെന്നും അദ്ദേഹം പറഞ്ഞു.
നിയോജകമണ്ഡലങ്ങൾ കേന്ദ്രീകരിച്ച് രക്തദാതാക്കളുടെ കമ്മിറ്റികൾ രൂപീകരിച്ച് പ്രവർത്തിക്കണമെന്നും അതിനായി ബി.ഡി.കെ പോലുള്ള സന്നദ്ധ സംഘടനകൾ മുന്നിട്ടിറങ്ങണമെന്നും എം.എൽ.എ നിർദ്ദേശിച്ചു. കൂടാതെ ആശുപത്രികളിലെ രക്തബാങ്കുകളുടെ പ്രവർത്തന സമയം വൈകുന്നേരം വരെ നീട്ടണമെന്ന ബി.ഡി.കെയുടെ ആവശ്യം ആരോഗ്യവകുപ്പ് മന്ത്രിയുടെ ശ്രദ്ധയിൽപ്പെടുത്തുമെന്നും അദ്ദേഹം ഉറപ്പുനൽകി.അൻസാർ ചേരാപുരം അധ്യക്ഷത വഹിച്ച ചടങ്ങിൽ ബി.ഡി.കെ രക്ഷാധികാരി ഡോ. ഷാഹുൽ ഹമീദ് അന്തരിച്ച ബി.ഡി.കെ സ്ഥാപകൻ വിനോദ് ഭാസ്കരൻ ഉൾപ്പെടെയുള്ള പ്രിയപ്പെട്ടവരുടെ ഓർമ്മകൾ പുതുക്കി അനുശോചന പ്രഭാഷണം നടത്തി.
യോഗത്തിൽ സ്റ്റഫി മാത്യു, വത്സരാജ് മണലാട്ട്, സജിത്ത് വി.പി, നബീൽ ബാബു, അനീഷ് ലാൽ, രഞ്ജിത്ത് താനൂർ, ജിനു ജോസഫ് എന്നിവർ ആശംസകൾ അർപ്പിച്ചു സംസാരിച്ചു. ഫസൽ ചാലാട് സ്വാഗതവും റുൻഷാദലി എം.പി നന്ദിയും രേഖപ്പെടുത്തി. ചടങ്ങിൽ വെച്ച് 2026-2027 വർഷത്തേക്കുള്ള പുതിയ ഭാരവാഹികളെയും തിരഞ്ഞെടുത്തു. നബീൽ ബാബു മലപ്പുറം (പ്രസിഡന്റ്), സജിത്ത് വി.പി കണ്ണൂർ (സെക്രട്ടറി), ജിനു ജോസഫ് കോട്ടയം (ട്രഷറർ) എന്നിവരാണ് പുതിയ ഭരണസമിതിക്ക് നേതൃത്വം നൽകുന്നത്.
