കണ്ണൂര് : കണ്ണൂര് തോട്ടടയിലെ ബോംബ് സ്ഫോടനത്തില് യുവാവ് കൊല്ലപ്പെട്ട കേസില് പ്രധാന പ്രതി മിഥുന് കീഴടങ്ങി. എടക്കാട് പോലീസ് സ്റ്റേഷനിലെത്തി പ്രതി കീഴടങ്ങുകയായിരുന്നു. പോലീസ് മിഥുനെ ചോദ്യം ചെയ്യുകയാണ്. നേരത്തെ ബോംബേറില് ഇയാള്ക്ക് പങ്കുണ്ടെന്ന് പോലീസ് കണ്ടെത്തിയിരുന്നു. വിവാഹ സംഘത്തിന് നേരെയുണ്ടായ ബോംബാക്രമണത്തില് ഏച്ചൂര് സ്വദേശി ജിഷ്ണു കൊല്ലപ്പെട്ട കേസിലാണ് പ്രധാന പ്രതി മിഥുന് പിടിയിലായിരിക്കുന്നത്.
കൊലപാതകത്തിന് ശേഷം ഒളിവില് പോയ മിഥുന് വേണ്ടി പോലീസ് തെരച്ചില് നടത്തിയിരുന്നു. ഇതിനിടയിലാണ് കേസിന്റെ അന്വേഷണ ചുമതലയുള്ള ഉദ്യോഗസ്ഥന് മുന്നില് മിഥുന് കീഴടങ്ങിയത്. കൊല്ലപ്പെട്ട ജിഷ്ണുവിന്റെ സുഹൃത്ത് കൂടിയാണ് മിഥുന്. ഇന്ന് പ്രതികള് സഞ്ചരിച്ച വാഹനം പോലീസ് കസ്റ്റഡിയിലെടുത്തിരുന്നു. വെള്ള ട്രാവലര് വാഹനമാണ് കസ്റ്റഡിയിലെടുത്തത്. കൊലപാതകം നടന്ന ദിവസം പ്രതികള് സംഭവ സ്ഥലത്തേക്ക് എത്തിയതും ഇവിടെ നിന്ന് രക്ഷപ്പെട്ടതും ഈ വാഹനത്തിലാണെന്നാണ് പോലീസിന്റെ നിഗമനം.
ബോംബ് എത്തിച്ചതും ഈ വാഹനത്തിലാണ്. കേസില് അറസ്റ്റിലായ ഒന്നാംപ്രതി അക്ഷയെ ഇന്ന് തലശ്ശേരി കോടതിയില് റിമാന്ഡ് ചെയ്യും. ഏച്ചൂര് സ്വദേശിയായ ഷമില് രാജിന്റെ വിവാഹത്തലേന്ന് ഉണ്ടായ തര്ക്കമാണ് ഒടുവില് കൊലപാതകത്തില് കലാശിച്ചത്. എതിരാളികളെ അക്ഷയ് ബോംബ് എറിയുന്നതിനിടെ സ്വന്തം സുഹൃത്ത് തന്നെയായ ജിഷ്ണുവിന്റെ തലയില്ത്തട്ടി ബോംബ് പൊട്ടിത്തെറിക്കുകയായിരുന്നു. തല പൊട്ടിച്ചിതറിയാണ് ജിഷ്ണു കൊല്ലപ്പെട്ടത്.
