കോട്ടയം : വായന കുറഞ്ഞു വരുന്ന കാലഘട്ടത്തിലും സാമൂഹിക പ്രതിബദ്ധതയുളള എഴുത്തുകാർ കടന്നുവരുന്നത് ശ്രദ്ധേയമാണെന്ന് ബസേലിയോസ് മാർത്തോമ്മ പൗലോസ് തൃതീയൻ കാതോലിക്ക ബാവ പറഞ്ഞു. കോട്ടയം ദർശന കച്ചറൽ സെന്ററിൽ ജോസഫ് എം പുതുശേരി രചിച്ച കാലം കണ്ണാടി നോക്കുന്നു എന്ന പുസ്തകത്തിന്റെ പ്രകാശനം നിർവഹിച്ച് സംസാരിക്കുകയായിരുന്നു കാതോലിക്കബാവ.
സാമൂഹിക പ്രതിബദ്ധതകൾ ഉൾക്കൊള്ളുന്ന വിമർശനങ്ങളാണ് ഭരണകൂടങ്ങളെ നേർവഴിക്ക് നയിക്കുക. പക്ഷം പിടിക്കാത്ത നല്ല എഴുത്തുകാർ സമൂഹത്തിൽ ഉയർന്നു വരണം. സമകാലിക വിഷയങ്ങളും സാധരണക്കാരുടെ പ്രശ്നങ്ങളും പഠിച്ച് എഴുത്തിലൂടെ ജനങ്ങളുടെ മുന്നിലേക്ക് എത്തിക്കുക എന്നത് വലിയ കാര്യമാണെന്നും അക്കാര്യത്തിൽ ജോസഫ് എം പുതുശേരിയുടെ കുറിപ്പുകൾ ഏറെ മൂല്യമുളളതാണെന്നും ബാവ പറഞ്ഞു.
കേരള കോൺഗ്രസ് ചെയർമാൻ പി ജെ ജോസഫ് ചടങ്ങിൽ അധ്യക്ഷത വഹിച്ചു. സി പി ഐ (എം) കേന്ദ്രകമ്മിറ്റിയംഗം വൈക്കം വിശ്വൻ ആദ്യപ്രതി ഏറ്റുവാങ്ങി. തിരുവഞ്ചൂർ രാധാകൃഷ്ണൻ, പി കെ കൃഷ്ണദാസ്, തോമസ് ചാഴിക്കാടൻ, ആന്റോ ആന്റണി, കെ സി ജോസഫ്, ഫാ (ഡോ) കെ എം ജോർജ്ജ്, മോൻസ് ജോസഫ്, കെ സുരേഷ് കുറുപ്പ്, ജോയി ഏബ്രഹാം,കുര്യൻ കെ തോമസ്, ഫാ എമിൽ പുള്ളിക്കാട്ടിൽ, എസ് രാജീവൻ, എ ആർ പ്രശാന്ത് എന്നിവർ ആശംസാ പ്രസംഗങ്ങൾ നടത്തി.
