സാവോ പോളോ : വൻകുടലിലെ ട്യൂമർ നീക്കംചെയ്ത ശസ്ത്രക്രിയക്കു ശേഷം ബ്രസീൽ ഫുട്ബോൾ ഇതിഹാസം പെലെ ഐ.സി.യുവിൽ. പെലെയുടെ ആരോഗ്യസ്ഥിതിയിൽ ആശങ്കപ്പെടാനൊന്നുമില്ലെന്നും ശസ്ത്രക്രിയക്കു ശേഷം അദ്ദേഹം സുഖംപ്രാപിക്കുകയാണെന്നും സാവോ പോളോയിലെ ആൽബർട്ട് ഐൻസ്റ്റീൻ ആശുപത്രി അധികൃതർ വ്യക്തമാക്കി.
ഇപ്പോൾ ഐ.സി.യുവിലുള്ള അദ്ദേഹം സംസാരിക്കുന്നുണ്ടെന്നും സാധാരണ രീതിയിൽ തന്നെ എല്ലാ കാര്യങ്ങളും ചെയ്യുന്നുണ്ടെന്നും ആശുപത്രി അധികൃതർ പറഞ്ഞു. ഓഗസ്റ്റ് അവസാനത്തോടെ മെഡിക്കൽ ചെക്കപ്പിനായി ആശുപത്രിയിൽ പ്രവേശിപ്പിച്ച പെലെയ്ക്ക് പരിശോധനയിൽ വൻകുടലിൽ ട്യൂമർ ഉള്ളതായി കണ്ടെത്തുകയായിരുന്നു. തുടർന്ന് ശസ്ത്രക്രിയയിലൂടെ ഇത് നീക്കം ചെയ്തു. ശസ്ത്രക്രിയ വിജയകരമായിരുന്നതായും താൻ സുഖമായിരിക്കുന്നതായും പെലെ സോഷ്യൽ മീഡിയയിൽ കുറിക്കുകയും ചെയ്തിരുന്നു.
