പത്തനംതിട്ട : പത്തനംതിട്ട ഓമല്ലൂര് റോഡില് കോളേജ് ജംഗ്ഷനില് ഓടയുടെ തകര്ന്ന സ്ലാബ് യാത്രക്കാര്ക്ക് ഭീഷണിയാകുന്നു. കോളേജ് വിദ്യാര്ഥികള് ഉള്പ്പടെ നിരവധി പേര് ബസ് കാത്ത് നില്ക്കുന്നതിന് സമീപമാണ് ഓടയുടെ സ്ലാബുകള് തകര്ന്ന് കിടക്കുന്നത്. സ്ലാബിനുള്ളിലെ കമ്പികള് കൂര്ത്ത് മുകളിലേക്ക് നില്ക്കുന്നതിനാല് ഇത് കാല്നട യാത്രക്കാര്ക്ക് വലിയ ഭീഷണിയാവുകയാണ്. സ്ലാബ് ഒടിഞ്ഞ ഭാഗത്ത് അപകട സൂചന നല്കുവാന് യാത്രക്കാരില് ആരോ ഇതിന് ചുറ്റിലും ഇന്റര്ലോക്ക് കട്ടകള് നിരത്തിയിരിക്കുന്നതും കാണാം. ഏറെ കാലങ്ങളായി സ്ലാബുകള് ഈ അവസ്ഥയിലായിട്ടും യാതൊരു നടപടികളും അധികൃതരുടെ ഭാഗത്ത് നിന്നും ഉണ്ടാകുന്നില്ല എന്നാണ് ജനങ്ങള് ഉയര്ത്തുന്ന ആക്ഷേപം.
സമീപത്തെ വ്യാപാരികളും നിരവധി തവണ അധികൃതര്ക്ക് പരാതി നല്കിയിരുന്നു. റോഡിലൂടെ പോകുന്ന വാഹനം ഒരു വശത്തേക്ക് ഒതുക്കിയാല് ടയറുകള് ഏത് നിമിഷവും ഓടയിലേക്ക് താഴുകയും വാഹനം മറിയുകയും ചെയ്യാം. കോളേജ് ജംഗ്ഷന് മുതല് ഓമല്ലൂര് വരെയുള്ള ഭാഗത്ത് പലയിടത്തും ഇത്തരത്തില് സ്കാബുകള് സ്ഥാപിക്കാതെയും സ്ലാബുകള് തകര്ന്നതുമായ അവസ്ഥയിലാണ് ഓടകള്. ആഴമേറിയ ഓടകളായതിനാല് അപകടത്തില്പ്പെടുന്നവര്ക്ക് വലിയ പരിക്കേല്ക്കുവാനും സാധ്യത കൂടുതലാണ്.
