ബെംഗളൂരു : കര്ണാടക മുഖ്യമന്ത്രി ബി.എസ് യെദിയൂരപ്പയുടെ മകള്ക്ക് കൊവിഡ് സ്ഥിരീകരിച്ചു. യെദിയൂരപ്പക്ക് കൊവിഡ് സ്ഥിരീകരിച്ചതിന് പിന്നാലെയാണ് മകളുടെ പരിശോധനാഫലവും പുറത്ത് വന്നിരിക്കുന്നത്. ഇരുവരെയും മണിപാലിലെ ആശുപത്രിയില് പ്രവേശിപ്പിച്ചിരിക്കുകയാണ്.
മുഖ്യമന്ത്രി ഇപ്പോള് നിരീക്ഷണത്തിലാണെന്നും ആരോഗ്യപ്രശ്നങ്ങളൊന്നുമില്ലെന്നും ആശുപത്രി അധികൃതര് അറിയിച്ചു. കഴിഞ്ഞ ദിവസം വൈകീട്ടോടെയാണ് യെദിയൂരപ്പയ്ക്ക് കൊവിഡ് സ്ഥിരീകരിച്ചത്. താനുമായി അടുത്ത ദിവസങ്ങളില് സമ്പര്ക്കത്തില് വന്നവര് ക്വാറന്റീനില് പോകണമെന്ന് യെദിയൂരപ്പ ഇന്നലെ ട്വീറ്റ് ചെയ്തിരുന്നു.
നേരത്തെ മുഖ്യമന്ത്രിയുടെ വിധാന് സൗധയിലെ ഓഫീസ് ജീവനക്കാര്ക്ക് രോഗം സ്ഥിരീകരിച്ചിരുന്നു. ഇതിന് പിന്നാലെ യെദിയൂരപ്പ വീട്ടില് നിരീക്ഷണത്തില് കഴിയുകയായിരുന്നു. യെദിയൂരപ്പയുമായി സമ്പര്ക്കത്തില് വന്നതിന് പിന്നാലെ മുന് ഐ.എസ്.ആര്.ഒ തലവന് കെ കസ്തൂരിരംഗന് കൊവിഡ് ടെസ്റ്റ് നടത്താനൊരുങ്ങുകയാണ്. രണ്ട് ദിവസം മുമ്പ് യെദിയൂരപ്പ കസ്തൂരിരംഗന്റെ വസതിയില് അദ്ദേഹത്തെ സന്ദര്ശിച്ചിരുന്നു.
