തിരുവനന്തപുരം : ബഫര്സോണ് വിഷത്തില് സ്വീകരിക്കേണ്ട തുടര്നടപടികള് ചര്ച്ച ചെയ്യാന് മുഖ്യമന്ത്രി പിണറായി വിജയന്റെ അധ്യക്ഷതയില് ഇന്ന് ഉന്നതതലയോഗം ചേരും. വൈകീട്ട് നാലിന് ഓണ്ലൈനായാണ് യോഗം. വനം മന്ത്രിയും ഉന്നത ഉദ്യോഗസ്ഥരും പങ്കെടുക്കും. വിഷയത്തില് സര്ക്കാര് കാര്യക്ഷമമായി ഇടപെടണമെന്നാവശ്യപ്പെട്ട് കെസിബിസിയുടെ പ്രതിനിധി സംഘം ഇന്ന് മുഖ്യമന്ത്രിയെ കാണും.
ബഫര്സോണ് വിഷയത്തില് സുപ്രീം കോടതി ഉത്തരവ് വന്ന് ഒരുമാസം പൂര്ത്തിയാകാനിരിക്കെയാണ് ഈ വിഷയത്തില് ഉയരുന്ന ആശങ്കകളും പരിഹാര സാധ്യകളും ചര്ച്ച ചെയ്യാന് മുഖ്യമന്ത്രി യോഗം വിളിച്ചത്. ഉത്തരവ് പൂര്ണതോതില് നടപ്പായാല് കേരളത്തിലുണ്ടായെക്കാവുന്ന പ്രതിസന്ധി തിട്ടപ്പെടുത്താന് ഇതിനോടകം തുടങ്ങിയ സര്വേയുടെ പുരോഗതിയും യോഗം വിലയിരുത്തും.
ഉത്തരവ് നടപ്പായാല് വന്യജീവി സങ്കേതങ്ങളുടെ ഒരു കിലോമീറ്റര് ചുറ്റളവില് വരാവുന്ന നിരോധനവും നിയന്ത്രണവും സംബന്ധിച്ച് കേരള റിമോട്ട് സെന്സിംഗ് ഏജന്സി ഉപഗ്രഹ ചിത്രങ്ങള് ഉപയോഗിച്ചാണ് സര്വേ നടത്തുന്നത്. മൂന്ന് മാസത്തിനകം ഈ നടപടി പൂര്ത്തിയാക്കി സുപ്രീം കോടതി നിയോഗിച്ച എംപവേര്ഡ് കമ്മിറ്റിയെയും കേന്ദ്ര വനംപരിസ്ഥിതി മന്ത്രാലയത്തെയും സമീപിക്കാനാണ് കേരളത്തിന്റെ തീരുമാനം
