റാന്നി: സംസ്ഥാന പാതയോരത്ത് വാളിപ്ലാക്കൽ അടച്ചിട്ടിരുന്ന വീട്ടിൽ മോഷണം. വാളിപ്ലാക്കല് പടിയിലുള്ള വയലായില് തമ്പിയുടെ വീട്ടിലാണ് മോഷണം നടന്നത്.
രണ്ടാഴ്ച മുൻപ് മക്കളോടൊപ്പം അമേരിക്കയിൽ പോയിരിക്കുകയാണ് തമ്പിയുടെ കുടുംബം. മുമ്പിലുള്ള പ്രാധാന വാതില് തകർത്തു കൊണ്ടാണ് മോഷ്ടാക്കള് അകത്ത് കയറിയത്. വീടിനുള്ളിലെ അലമാരകളിലെ തുണികൾ എല്ലാം വാരിവലിച്ചിട്ട് തിരച്ചിൽ നടത്തിയിട്ടുണ്ട്. വിലപിടിപ്പുള്ള സാധനങ്ങള് കൊണ്ടുപോകാൻ കഴിഞ്ഞിട്ടില്ലെന്നാണ് നിഗമനം.
ഇതിന് മുമ്പും ഇവിടെ മോഷണ ശ്രമം നടന്നിട്ടുണ്ട്. വീടിന്റെ മുന്നിലെ കതക് കല്ല് കൊണ്ട് തകർത്താണ് മോഷ്ടാക്കള് അകത്ത് കയറിയത്. ആള് സ്ഥലത്തില്ല എന്ന് മനസ്സിലാക്കിയ ആരോ ആണ് ഈ കൃത്യത്തിനു പിന്നിൽ എന്നാണ് സംശയം. വീട് സൂക്ഷിക്കുന്നവർ ഇന്ന് വീട്ടിൽ എത്തിയപ്പോഴാണ് മോഷണ വിവരം അറിയുന്നത്. റാന്നി പോലീസ് സ്ഥലത്തെത്തി കൂടുതൽ അന്വേഷണം ആരംഭിച്ചിട്ടുണ്ട്.
