കൊല്ലം : അഞ്ചലില്‍ സ്വകാര്യ ബസ് ഉടമയുടെ മൃതദേഹം കത്തിക്കരിഞ്ഞ നിലയില്‍ കണ്ടെത്തി. അഞ്ചല്‍ അഗസ്ത്യക്കോട് സ്വദേശിയും കാര്‍ത്തിക ബസ്സിന്റെ ഉടമയുമായ ഉല്ലാസ് ആണ് മരിച്ചത്. രാവിലെ പ്രഭാത സവാരിക്കിറങ്ങിയവരാണ് മൃതദേഹം കത്തിക്കരിഞ്ഞ നിലയില്‍ കണ്ടത്. അഞ്ചല്‍ പുനലൂര്‍ റോഡില്‍ സെന്റ് ജോര്‍ജ്ജ് സ്കൂളിന് എതിര്‍വശം നിര്‍മ്മാണം നടക്കുന്ന അഞ്ചല്‍ ബൈപ്പാസില്‍ ആണ് മൃതദേഹം കണ്ടത്.
കൊല്ലത്ത് നിന്നും വിരലടയാള വിദഗ്ധരും ഡോഗ് സ്ക്വാഡും പരിശോധന നടത്തി. മൊബൈല്‍ ഫോണും കത്തിക്കരിഞ്ഞ ഒരു ജോഡി ചെരിപ്പും വാച്ചും മൃതദേഹത്തിന് സമീപത്തു നിന്ന് കണ്ടെത്തിയിരുന്നു. മൊബൈല്‍ ഫോണ്‍ പരിശോധനയിലാണ് മൃതശരീരം ഉല്ലാസിന്റേതാണെന്ന് തിരിച്ചറിഞ്ഞത്. കൊല്ലം റൂറല്‍ എസ് പി കെ വി രവിയുടെ നേതൃത്വത്തിലുള്ള പോലീസ് സംഘമാണ് അന്വേഷിക്കുന്നത്. മരണത്തില്‍ ദുരൂഹതയുണ്ടെന്നും സമഗ്രമായ അന്വേഷണം വേണമെന്നും പ്രൈവറ്റ് ബസ് ഓണേഴ്സ് അസോസിയേഷന്‍ ഭാരവാഹികള്‍ ആവശ്യപ്പെട്ടു.
