പത്തനംതിട്ട : പത്തനംതിട്ട നഗരത്തിലെ വിവിധ ഭാഗങ്ങളില് രാത്രികാലങ്ങളില് പ്ലാസ്റ്റിക് മാലിന്യങ്ങള് കൂട്ടിയിട്ട് കത്തിക്കുന്നത് പതിവാകുന്നു. നഗരത്തിലെ തുറന്നു കിടക്കുന്ന ഓടകളിലും കെട്ടിടങ്ങളുടെ പരിസരത്തുമാണ് മാലിന്യങ്ങള് കത്തിക്കുന്നത്. പ്ലാസ്റ്റിക് മാലിന്യങ്ങള് കത്തിക്കുമ്പോള് ഉണ്ടാകുന്ന ദുര്ഗന്ധം സമീപത്ത് താമസിക്കുന്ന ആളുകള്ക്കും ആശുപത്രികളിലെ രോഗികള്ക്കും ഒരുപോലെ ബുദ്ധിമുട്ട് സൃഷ്ടിക്കുന്നു. അര്ദ്ധരാത്രി സമയത്താണ് ഇത്തരത്തില് മാലിന്യങ്ങള് കത്തിക്കുന്നത്.
മാലിന്യങ്ങള് ഒഴിവാക്കാന് ആളുകള് സ്വീകരിക്കുന്ന എളുപ്പമാര്ഗമാണ് ഇതെങ്കിലും ഗുരുതരമായ രോഗങ്ങള്ക്ക് ഇത് കാരണമാകും. നഗരത്തില് മാലിന്യ സംസ്കരണ സംവിധാനങ്ങള് ഇല്ലാതെ വന്നതോടെ വ്യാപാരികള് ഉള്പ്പെടെയുള്ളവര് മാലിന്യങ്ങള് കത്തിച്ച് കളയുന്ന സംഭവങ്ങള് പതിവാണ്. പത്തനംതിട്ട മിനി സിവില് സ്റ്റേഷന് കെട്ടിട പരിസരത്തും ഇത്തരത്തില് രാത്രി സമയത്ത് മാലിന്യങ്ങള് കത്തിക്കുന്നതായി പറയുന്നു.
