പത്തനംതിട്ട : പത്തനംതിട്ട ജില്ലയുടെ വിവിധ ഭാഗങ്ങളില് കാടുകയറി കിടക്കുന്ന സ്വകാര്യ ഭൂമികള് ഇഴജന്തുക്കളുടെ താളവമായി മാറുന്നു. ജില്ലയുടെ കിഴക്കന് മലയോര മേഖലയായ ചിറ്റാര്, തണ്ണിത്തോട്, സീതത്തോട് മേഖലകളും കലഞ്ഞൂര്, അരുവാപ്പുലം പഞ്ചായത്തുകളിലെ ചിലയിടങ്ങളും റാന്നി താലൂക്കിലെ മലയോര മേഖലകളിലുമാണ് ഇത്തരത്തിലുള്ള സ്വകാര്യ ഭൂമികള് ഉള്ളത്. ഇതില് പലതിന്റെയും ഉടമസ്ഥര് നാട്ടില് ഇല്ലാത്തതിനാല് ഇത്തരം ഭൂമികള് ആരും നോക്കാനില്ലാതെ അനാഥമായി കിടക്കുകയാണ്. ഇങ്ങനെ കാടുകയറി കിടക്കുന്ന സ്ഥലങ്ങളില് ഇഴജന്തുക്കള് വര്ദ്ധിച്ചതോടെ നാട്ടുകാര് കൂടുതല് ഭീതിയിലാണിപ്പോള്.
കാടുപിടിച്ച പറമ്പുകളില് നിന്നും ചൂടുകൂടിയതോടെ പാമ്പുകള് ജനവാസ മേഖലയില് ഇറങ്ങുന്നത് പതിവായി മാറിയിട്ടുണ്ട്. ഗ്രാമ പഞ്ചായത്തുകള് ഇടപെട്ട് സ്വകാര്യ ഭൂ ഉടമകള്ക്ക് നോട്ടീസ് നല്കി കാടുകള് തെളിക്കാന് കഴിയുമെങ്കിലും തികഞ്ഞ അനാസ്ഥയാണ് ഉദ്യോഗസ്ഥരുടെ ഭാഗത്തുനിന്നും ഉണ്ടാകുന്നത്. ഇഴജന്തുക്കളോടൊപ്പം തന്നെ പുലിയും പന്നിയും അടക്കമുള്ള ജീവികളുടെ എണ്ണവും ഇത്തരം ഭൂമികളില് വര്ധിക്കുന്നു.
