തിരുവനന്തപുരം: ജൂണ് 7 മുതല് സംസ്ഥാനത്ത് നടത്താന് നിശ്ചയിച്ചിരുന്ന സ്വകാര്യബസ് സമരം മാറ്റിവെച്ചു. മുഖ്യമന്ത്രി വിദേശത്ത് നിന്ന് തിരിച്ചുവന്നതിനുശേഷം തുടര് നടപടികള് തീരുമാനിക്കും. പെര്മിറ്റ് പ്രശ്നം കോടതിയുടെ പരിഗണനയിലായതിനാലും, വിദ്യാര്ത്ഥി കണ്സഷന് റിപ്പോര്ട്ട് ജൂണ് 15നു ശേഷം മാത്രമേ സര്ക്കാരിനു ലഭിക്കുകയുള്ളൂ എന്നതിനാലുമാണ് സമരം മാറ്റി വെച്ചെന്നെന്ന് ബസ് ഉടമകള് അറിയിച്ചു. സ്വകാര്യബസുകളുടെ പെര്മിറ്റുകള് അതേപടി പുതുക്കി നല്കുക, വിദ്യാര്ത്ഥികളുടെ യാത്രാനിരക്ക് വര്ദ്ധിപ്പിക്കുക തുടങ്ങിയ ആവശ്യങ്ങള് ഉന്നയിച്ചാണ് സമരം നടത്തുവാന് നിശ്ചയിച്ചിരുന്നത്.
വിദ്യാര്ത്ഥികളുടെ ബസ് ചാര്ജ് വര്ധിപ്പിക്കണമെന്നതാണ് പ്രധാന ആവശ്യം. വിദ്യാര്ഥികളുടെ ബസ് ചാര്ജ് അഞ്ചു രൂപയെങ്കിലും ആക്കണം. വിദ്യാര്ത്ഥികളുടെ സൗജന്യ നിരക്കിന് പ്രായപരിധി ഏര്പ്പെടുത്തണമെന്നും നിലവില് സര്വീസ് നടത്തുന്ന മുഴുവന് സ്വകാര്യ ബസുകളുടെയും പെര്മിറ്റുകള് അതേപടി നിലനിര്ത്തണമെന്നുമാണ് ആവശ്യം.
