കായംകുളം: ലാഭ വിഹിതം വാഗ്ദാനം ചെയ്ത് തട്ടിപ്പ് നടത്തിയ കേസില് യുവതി അറസ്റ്റില്. തുണി ഇറക്കുമതി ബിസിനസില് ലാഭ വിഹിതം വാഗ്ദാനം ചെയ്ത് തട്ടിപ്പ് നടത്തിയ കേസില് കോട്ടയം ചങ്ങനാശ്ശേരിയില് അനസിന്റെ ഭാര്യ സജന സലീമാണ് (41) അറസ്റ്റിലായത്. കേസില് രണ്ടാം പ്രതിയായ അനസ് വിദേശത്താണ്. കീരിക്കാട് സ്വദേശിയുടെ രണ്ടേകാല് കോടിയോളം രൂപ തട്ടിയെടുത്ത കേസിലാണ് സജന പിടിയിലായത്.
ബല്ഹോത്ര എന്ന സ്ഥലത്ത് തുണി ഇറക്കുമതിയുടെ മൊത്ത കച്ചവടക്കാരിയെന്ന നിലയിലാണ് കീരിക്കാട് സ്വദേശിയുമായി സൗഹൃദം സ്ഥാപിക്കുന്നത്. വിശ്വാസം നേടിയ ശേഷം ലാഭ വിഹിതം ഉറപ്പ് നല്കി കച്ചവടത്തില് പങ്കാളിയാക്കുകയായിരുന്നു. ആദ്യ കാലങ്ങളില് കൃത്യമായി ലാഭ വിഹിതം നല്കി വിശ്വാസം നേടിയ ശേഷം കൂടുതല് തുക വാങ്ങുകയായിരുന്നു. ഇവര് പിടിയിലായതറിഞ്ഞ് കൂടുതല് പേര് പരാതിയുമായി എത്തിയിട്ടുണ്ടെന്ന് പോലീസ് പറഞ്ഞു.
