തിരുവനന്തപുരം : 29ാമത് സംസ്ഥാന ടെലിവിഷന് അവാര്ഡില് മികച്ച സീരിയലിനും രണ്ടാമത്തെ സീരിയലിനും പുരസ്കാരം നല്കേണ്ടെന്ന് ജൂറി തീരുമാനം. കലാമൂല്യമുള്ളത് ഒന്നുമില്ലെന്ന് ചൂണ്ടിക്കാട്ടിയായിരുന്നു ജൂറി ഇത്തരമൊരു തീരുമാനത്തിലേക്ക് എത്തിയത്. ടെലിവിഷന് പരമ്പരകളില് സ്ത്രീകളെയും കുട്ടികളെയും മോശമായി ചിത്രീകരിച്ചു കാണുന്നതില് കടുത്ത ആശങ്ക രേഖപ്പെടുത്തുന്നുവെന്നും ജൂറി വ്യക്തമാക്കി.
വീടുകളില് കുടുംബാംഗങ്ങള് ഒരുമിച്ചിരുന്നു കാണുന്ന ഒരു മാധ്യമം എന്ന നിലയില് ടെലിവിഷന് പരമ്പരകളിലും കോമഡി പരിപാടികളിലും ചാനലുകള് കൂടുതല് ഉത്തരവാദിത്തബോധം പുലര്ത്തണമെന്ന് എന്ട്രികള് വിലയിരുത്തികൊണ്ട് ജൂറി അഭിപ്രായപ്പെട്ടു. കുട്ടികള്ക്കുവേണ്ടിയുള്ള ഹ്രസ്വചിത്രവിഭാഗത്തില് എന്ട്രികള് സമര്പ്പിക്കപ്പെട്ടില്ല എന്നത് ഖേദകരമാണെന്നും ജൂറി വ്യക്തമാക്കി.
ജൂറിയുടെ മുന്നിലെത്തിയ എന്ട്രികളില് ഭൂരിഭാഗവും അവാര്ഡിന്റെ ഉദ്ദേശ്യലക്ഷ്യങ്ങള് ഒന്നും തന്നെ സാക്ഷാത്കരിക്കുന്നവയായിരുന്നില്ല. അതുകൊണ്ടുതന്നെ മികച്ച സീരിയല്, മികച്ച രണ്ടാമത്തെ സീരിയല്, മികച്ച സംവിധായകന്, മികച്ച കലാസംവിധായകന് എന്നീ വിഭാഗങ്ങളില് ഈ വര്ഷം പുരസ്കാരം നല്കാന് സാധിച്ചിട്ടില്ല. മറ്റു വിഭാഗങ്ങളിലെ എന്ട്രികളുടെ നിലവാരത്തകര്ച്ച കാരണം അവാര്ഡുകള് നിര്ണയിക്കുന്നതിന് ജൂറിക്ക് ഏറെ പരിശ്രമിക്കേണ്ടി വന്നു.
സംവിധായകന് ആര്.ശരത് ചെയര്മാന് ആയ ജൂറിയാണ് കഥാവിഭാഗം പുരസ്കാരം നിര്ണ്ണയിച്ചത്. എഴുത്തുകാരനും തിരക്കഥാകൃത്തുമായ എസ്.ഹരീഷ്, അഭിനേത്രി ലെന കുമാര്, സംവിധായകനും തിരക്കഥാകൃത്തുമായ സുരേഷ് പൊതുവാള്, സംവിധായകന് ജിത്തു കോളയാട്, ചലച്ചിത്ര അക്കാദമി സെക്രട്ടറി സി.അജോയ് എന്നിവരായിരുന്നു ജൂറി അംഗങ്ങള്.
