കോഴിക്കോട് : ജില്ല പ്രസിഡന്റ് അറിയാതെ വ്യാജരേഖ ചമച്ച് കോണ്ഗ്രസ് എസിന്റെ ജില്ല കമ്മിറ്റിയുടെ പേരില് സഹകരണ ബാങ്കില് അക്കൗണ്ട് തുടങ്ങിയ ഭാരവാഹിക്കെതിരെ കേസ്. ജില്ല സെക്രട്ടറിയും സംസ്ഥാന നിര്വാഹകസമിതി അംഗവുമായ സി.പി ഹമീദിനെതിരെയാണ് കസബ പോലീസ് വിവിധ വകുപ്പുകള് പ്രകാരം കേസെടുത്തത്. ജില്ല പ്രസിഡന്റ് സത്യചന്ദ്രന്റെ പരാതിയില് പ്രാഥമിക അന്വേഷണം നടത്തിയാണ് പോലീസ് കേസെടുത്തത്. വ്യാജരേഖ ചമക്കല്, വ്യാജരേഖ യഥാര്ഥ രേഖയായി അവതരിപ്പിക്കല്, വിശ്വാസവഞ്ചന തുടങ്ങിയ വകുപ്പുകളിലാണ് കേസ്.
പ്രസിഡന്റിന്റെ പേരും ഒപ്പും വ്യാജമായി ചമച്ചാണ് അക്കൗണ്ട് തുടങ്ങിയതെന്ന് അന്വേഷണത്തില് വ്യക്തമായതായി പോലീസ് പറഞ്ഞു. സഹകരണബാങ്കിന്റെ ചാലപ്പുറം ശാഖയിലാണ് ജില്ല പ്രസിഡന്ററിയാതെ ഹമീദ് ബാങ്ക് അക്കൗണ്ട് തുടങ്ങിയത്. പരാതിക്കാരനില്നിന്ന് വെള്ളിയാഴ്ച പോലീസ് വിശദവിവരങ്ങള് തേടിയിരുന്നു. സഹകരണ ബാങ്കിനെതിരെ അന്വേഷണമില്ലെന്ന് കസബ പോലീസ് അറിയിച്ചു. ജില്ല പ്രസിഡന്ററിയാതെ കോണ്ഗ്രസ് എസിന് ബാങ്ക് അക്കൗണ്ട് തുടങ്ങിയ വാര്ത്ത കഴിഞ്ഞ ദിവസം റിപ്പോര്ട്ട് ചെയ്തിരുന്നു. തുടര്ന്ന് പാര്ട്ടിയില് സംസ്ഥാനതലത്തില് സംഭവം വിവാദമായി. ഈ മാസം 22 ന് ചേരുന്ന സംസ്ഥാന കമ്മിറ്റിയില് വിഷയം ചര്ച്ചയാകും.
