ഇടുക്കി: കടുവകുഞ്ഞുങ്ങളെന്ന വ്യാജേന പൂച്ചക്കുട്ടികളെ നിറമടിച്ച് വില്പ്പനയ്ക്ക് വെച്ച യുവാവ് പിടിയില്.
മറയൂരിനടുത്തുള്ള തമിഴ്നാട് അതിര്ത്തി ഗ്രാമത്തിലാണു സംഭവം. തിരുവണ്ണാമല ആരണി സ്വദേശി പാര്ത്ഥിപന് (24) ആണ് പിടിയിലായത്. വാട്സ് ആപ്പിലൂടെയാണ് ഇയാള് കടുവക്കുഞ്ഞുങ്ങളെ വില്ക്കാനുണ്ടെന്ന് പരസ്യം നല്കിയത്.
മൂന്ന് മാസം പ്രായമായ കടുവക്കുഞ്ഞ് ഒന്നിന് 25 ലക്ഷം രൂപയാണ് പരസ്യത്തില് പറഞ്ഞിരുന്നത്. വാട്സ്ആപ്പില് സ്റ്റാറ്റസ് ആയിട്ടാണ് കടുവക്കുഞ്ഞുങ്ങളെ വില്ക്കാനുണ്ടെന്ന് പരസ്യം നല്കിയത്. കടുവകുഞ്ഞുങ്ങളെ ആവശ്യമുള്ളവര് പണം നല്കിയാല് പത്ത് ദിവസത്തിനകം എത്തിച്ചു നല്കുമെന്നും പാര്ഥിപന് പറഞ്ഞു. വിവരമറിഞ്ഞ വനംവകുപ്പ് പാര്ത്ഥിപനെ പിടികൂടി.
മൂന്ന് കടുവക്കുഞ്ഞുങ്ങള്ക്ക് സ്റ്റീല് പാത്രത്തില് ഭക്ഷണം നല്കുന്ന ഫോട്ടോ സഹിതമായിരുന്നു പരസ്യം. വനംവകുപ്പ് അന്വേഷണം ആരംഭിച്ചതോടെ പാര്ഥിപന് ഒളിവില് പോയി. വനംവകുപ്പ് ഇയാളുടെ വീട്ടില് റെയ്ഡ് നടത്തിയെങ്കിലും കടുവക്കുഞ്ഞുങ്ങളെ കണ്ടെത്താനായിരുന്നില്ല. പിന്നീട് വെല്ലൂര് ചര്പ്പണമേടില് നിന്ന് പാര്ഥിപനെ അറസ്റ്റ് ചെയ്തു. കടുവക്കുഞ്ഞുങ്ങളെ അന്വേഷിച്ചെത്തുന്നവര്ക്ക് പൂച്ച കുട്ടികളെ പെയിന്റ് അടിച്ച് നല്കാനായിരുന്നു പദ്ധതിയെന്ന് പ്രതി മൊഴി നല്കിയതായി വനംവകുപ്പ് പറഞ്ഞു. അമ്പത്തൂരിലുളള സുഹൃത്ത് അയച്ചുകൊടുത്ത കടുവക്കുഞ്ഞുങ്ങളുടെ ചിത്രമാണ് തട്ടിപ്പിനായി ഇയാള് ഉപയോഗിച്ചതെന്നാണ് വിവരം.
