പത്തനംതിട്ട : കെഎസ്ഇബി ലിമിറ്റഡിന്റെ ശബരിഗിരി ജലവൈദ്യുത പദ്ധതിയുടെ ഭാഗമായ കക്കി – ആനത്തോട് റിസര്വോയറിന്റെ പരമാവധി ജലനിരപ്പ് 981.46 മീറ്ററാണ്. കക്കി ആനത്തോട് റിസര്വോയറിന്റെ നീല, ഓറഞ്ച്, റെഡ് അലര്ട്ടുകള് പ്രഖ്യാപിക്കുന്നത് യഥാക്രമം 979.46 മീറ്റര്, 980.46 മീറ്റര്, 980.96 മീറ്റര് ജലനിരപ്പ് എത്തിച്ചേരുമ്പോഴാണ്. ഇന്ന് (03.12.2021) റിസര്വോയറിന്റെ ജലനിരപ്പ് 980.34 മീറ്ററില് എത്തിയിട്ടുള്ളതാണ്. അതിനാല് കെഎസ്ഇബി അണക്കെട്ട് സുരക്ഷാ വിഭാഗം നീല അലര്ട്ട് പ്രഖ്യാപിച്ചു.
ഈ സാഹചര്യത്തില് പമ്പാ നദിയുടെയും കക്കാട്ടാറിന്റെയും ഇരുകരകളില് താമസിക്കുന്നവരും പൊതുജനങ്ങളും ജാഗ്രത പുലര്ത്തണമെന്ന് ജില്ലാ കളക്ടറും ജില്ലാ ദുരന്തനിവാരണ അതോറിറ്റി ചെയര്പേഴ്സണുമായ ഡോ. ദിവ്യ എസ്. അയ്യര് അറിയിച്ചു. റിസര്വോയറിലെ ജലനിരപ്പ് 980.96 മീറ്റര് എത്തിച്ചേരുന്ന സാഹചര്യത്തില് റെഡ് അലര്ട്ട് പ്രഖ്യാപിക്കുന്നതും സംസ്ഥാന ദുരന്ത നിവാരണ അതോറിറ്റി പ്രസിദ്ധീകരിച്ചിട്ടുള്ള ഓറഞ്ച് ബുക്കിലെ നിര്ദേശങ്ങള്ക്ക് അനുസൃതമായി വാര്ത്ത പത്ര, ദൃശ്യ, ശ്രവ്യ മാധ്യമങ്ങള് വഴി പ്രസിദ്ധീകരിക്കുന്നതും, ആവശ്യമെങ്കില് റിസര്വോയറില് നിന്നും നിയന്ത്രിത അളവില് ജലം തുറന്നു വിടുന്നതുമായിരിക്കും.
