തൃശൂര് : കരിവന്നൂര് സഹകരണ ബാങ്ക് വായ്പ തട്ടിപ്പിലെ പ്രതികളുമായി മുന്മന്ത്രി എ.സി മൊയ്തീന് ബന്ധമുണ്ടെന്ന് സൂചന. പ്രതികളുടെ ഭാര്യമാര്ക്ക് പങ്കാളിത്തമുള്ള സൂപ്പര് മാര്ക്കറ്റ് എ.സി മൊയ്തീന് മന്ത്രിയായിരിക്കെയാണ് ഉദ്ഘാടനം ചെയ്തത്.
പ്രതികളായ ബിജു കരീമിന്റെയും സി.കെ ജില്സിന്റെയും ഭാര്യമാര്ക്കാണ് സൂപ്പര് മാര്ക്കറ്റില് പങ്കാളിത്തമുള്ളത്. 2019 ജനുവരി 20നാണ് നടവരമ്പിലാണ് ‘ഷീ ഷോപ്പി’ എന്ന പേരില് സൂപ്പര് മാര്ക്കറ്റ് ഉദ്ഘാടനം ചെയ്തത്. എ.സി മൊയ്തീനൊപ്പം ബിജു കരീമും ഉദ്ഘാടന ചടങ്ങില് പങ്കെടുത്തിരുന്നു.
ബിജു കരീം എ.സി മൊയ്തീന്റെ ബന്ധുവാണെന്നും തട്ടിപ്പ് മൊയ്തീനും വിജയരാഘവനും അറിഞ്ഞുകൊണ്ടാണെന്നും ബി.ജെ.പി ആരോപണം ഉന്നയിച്ചിരുന്നു. എന്നാല് ബിജു കരീം തന്റെ ബന്ധുവല്ലെന്നും അയാളെ അറിയില്ലെന്നും തട്ടിപ്പില് തന്റെ ബന്ധുക്കളാരെങ്കിലും ഉള്പ്പെട്ടോ എന്നറിയില്ലെന്നുമായിരുന്നു എ.സി മൊയ്തീന്റെ വിശദീകരണം.