പത്തനംതിട്ട : സെന്സസ് 2027 ന്റെ ഭാഗമായി സെന്സസ് ഡയറക്ടറേറ്റിന്റെയും ജില്ലാ ഭരണകൂടത്തിന്റെയും സംയുക്താഭിമുഖ്യത്തില് സ്കൂള്, കോളജ് വിദ്യാര്ഥികള്ക്കായി സംഘടിപ്പിച്ച പ്രശ്നോത്തരി വിജയികള്ക്ക് ജില്ലാ കളക്ടര് എ.നിസാമുദ്ദീന് സമ്മാനങ്ങള് വിതരണം ചെയ്തു. ആരോണ് ബിനോയി (ഗവ. ബോയ്സ് എച്ച്.എസ്.എസ്, അടൂര്), വി.ആര്. സ്വാതിക (ബി.എ.എം കോളേജ്, തുരുത്തിക്കാട്), ലക്ഷ്മി അജിത് കുമാര് (മാര്ത്തോമ്മ എച്ച്.എസ്.എസ്, പത്തനംതിട്ട), ബിനിയ സാബു (മാര്ത്തോമ്മ കോളേജ്, തിരുവല്ല), എ.ലക്ഷ്മിപ്രിയ (ബാലികാമഠം എച്ച്.എസ്.എസ്, തിരുവല്ല), അദ്വൈത് അനില് (എന്.എസ്.എസ്.എച്ച്.എസ്.എസ് പന്തളം) എന്നിവരാണ് വിജയികളായത്.
സെന്സസ് ആദ്യഘട്ട പ്രവര്ത്തനങ്ങളുടെ ബോധവല്ക്കരണത്തിന്റെ ഭാഗമായാണ് പ്രശ്നോത്തരി സംഘടിപ്പിച്ചതെന്ന് ജില്ലാ കളക്ടര് പറഞ്ഞു. സെന്സസ് പ്രവര്ത്തനങ്ങളില് കുട്ടികള്ക്ക് വലിയ പങ്കുണ്ട്. രണ്ടാംഘട്ടത്തിലും അവരുടെ സഹായം ആവശ്യമുണ്ട്. അടുത്ത പത്ത് വര്ഷത്തേക്ക് വേണ്ടിയുള്ള സെന്സസ് വിവരങ്ങള് ഏറ്റവും കൂടുതല് ഉപയോഗപ്രദമാകുന്നത് യുവതലമുറയ്ക്കാണെന്നും കളക്ടര് പറഞ്ഞു. കളക്ടറേറ്റ് ഗവി കോണ്ഫറന്സ് ഹാളില് നടന്ന ചടങ്ങില് എ.ഡി.എം ആര്. രാജലക്ഷ്മി, സെന്സസ് ഡയറക്ടറേറ്റ് ഡെപ്യൂട്ടി ഡയറക്ടര് വി.സി നിഷ, വിദ്യാര്ഥികള്, രക്ഷിതാക്കള് തുടങ്ങിയവര് പങ്കെടുത്തു.
