പത്തനംതിട്ട : സെന്സസ് 2027ന്റെ ഭാഗമായി പൊതുജനങ്ങള്ക്ക് സ്വന്തമായി വിവരങ്ങള് (സെല്ഫ് എന്യൂമറേഷന്) ജൂണ് 16 മുതല് 30 വരെ ഓണ്ലൈനായി രേഖപ്പെടുത്താം. സെന്സസ് ഉദ്യോഗസ്ഥര് വീടുകളില് എത്തുന്നതിന് മുമ്പ് വ്യക്തികള്ക്ക് തങ്ങളുടെ കുടുംബത്തിലെ വിവരം ഓണ്ലൈന് പോര്ട്ടലിലൂടെ നേരിട്ട് സമര്പ്പിക്കാനുള്ള സംവിധാനമാണ് സെല്ഫ് എന്യുമറേഷന്. 15-20 മിനിറ്റിനുള്ളില് പ്രക്രിയ പൂര്ത്തിയാക്കാം. https://se.census.gov.in എന്ന പോര്ട്ടലിലൂടെ സംസ്ഥാനം തിരഞ്ഞെടുത്ത് കുടുംബനാഥന്റെ പേരും മൊബൈല് നമ്പറും നല്കി രജിസ്റ്റര് ചെയ്യാം.
ഒരു മൊബൈല് നമ്പര് ഒരു കുടുംബത്തിന് മാത്രമേ ഉപയോഗിക്കാനാകൂ. ഇഷ്ടമുള്ള ഭാഷ തിരഞ്ഞെടുത്ത് ഒ.ടി.പി. വഴി വെരിഫിക്കേഷന് പൂര്ത്തിയാക്കണം. ഒരിക്കല് തിരഞ്ഞെടുത്ത ഭാഷ പിന്നീട് മാറ്റാനാകില്ല. പോര്ട്ടലിലെ മാപ്പില് വീടിന്റെ കൃത്യമായ സ്ഥാനം ‘റെഡ് മാര്ക്കര്’ ഉപയോഗിച്ച് അടയാളപ്പെടുത്തണം. സെന്സസുമായി ബന്ധപ്പെട്ട ചോദ്യങ്ങള്ക്ക് മറുപടി നല്കി വിവരങ്ങള് പരിശോധിച്ച ശേഷം ഫൈനല് സബ്മിറ്റ് നല്കുക. വിവരങ്ങള് നല്കി കഴിഞ്ഞാല് ‘എച്ച്’ എന്ന് തുടങ്ങുന്ന 11 അക്ക സെല്ഫ്-ഇന്യൂമറേഷന് ഐഡി (എസ് ഇ ഐഡി) ലഭിക്കും.
സെന്സസ് ഉദ്യോഗസ്ഥര് പിന്നീട് വീട് സന്ദര്ശിക്കുമ്പോള് ഈ ഐഡി കൈമാറണം. ഇതോടെ വിവരങ്ങള് ഡിജിറ്റലായി സ്ഥിരീകരിക്കപ്പെടും. ജൂണ് 30നകം വിവരങ്ങള് സമര്പ്പിക്കാത്തവര്ക്ക് സെല്ഫ്-ഇന്യൂമറേഷന് പൂര്ത്തിയാക്കാനാകില്ല. അങ്ങനെയുള്ളവരുടെ വിവരങ്ങള് ഉദ്യോഗസ്ഥര് നേരിട്ട് ശേഖരിക്കും. സര്ക്കാര് ഉദ്യോഗസ്ഥരും പൊതുജനങ്ങളും ഈ സൗകര്യം പരമാവധി പ്രയോജനപ്പെടുത്തണമെന്ന് പ്രിന്സിപ്പല് സെന്സസ് ഓഫീസര് കൂടിയായ ജില്ല കളക്ടര് എസ് പ്രേം കൃഷ്ണന് അറിയിച്ചു. പോര്ട്ടലില് യൂസര് ഗൈഡും ലഭ്യമാണ്.
