കൊച്ചി: എറണാകുളം സൗത്ത് ജനതാ റോഡിൽ വിദ്യാർഥികൾ തമ്മിൽ നടുറോഡിൽ കൂട്ടയടി. ഇന്നലെ രാത്രിയായിരുന്നു സംഭവം. തേവര എസ്.എച്ച് കോളേജിലെ വിദ്യാർഥികളും ലോ കോളേജിലെ വിദ്യാർഥികളും തമ്മിലാണ് സംഘർഷമുണ്ടായത്. റോഡിൽ പരസ്യമായി വിദ്യാർഥികൾ തമ്മിൽ ഏറ്റുമുട്ടുകയായിരുന്നു. തേവര എസ് എച്ച് കോളേജിലെ രണ്ട് വിദ്യാർത്ഥികളും അവരുടെ സുഹൃത്തുക്കളും പ്രദേശത്തെ ഒരു ചായക്കടയിൽ എത്തിയതാണ് സംഘർഷത്തിന് തുടക്കം. ഈ സമയത്ത് ലോ കോളേജിലെ വിദ്യാർത്ഥികളും അവിടെയുണ്ടായിരുന്നു. ഇതിനിടെ പെട്ടെന്നുണ്ടായ പ്രകോപനമാണ് കൂട്ടയടിയിൽ കലാശിച്ചത്.
നിലത്തുവീണ ഒരു യുവാവിന്റെ തലയ്ക്ക് ഹെൽമറ്റുകൊണ്ട് അടിയേറ്റു. ഈ വിദ്യാർത്ഥി പാലാരിവട്ടം പോലീസിൽ പരാതി നൽകി. കേസെടുത്തിട്ടില്ലെന്നാണ് വിവരം. വിദ്യാർത്ഥിയിൽ നിന്ന് കൂടുതൽ വിവരങ്ങൾ ശേഖരിച്ചതിനുശേഷമാകും കേസെടുക്കുകയെന്ന് പോലീസ് അറിയിച്ചു. സംഭവത്തിന്റെ കാരണം വ്യക്തമല്ല. സംഘർഷത്തിന്റെ ദൃശ്യങ്ങൾ പുറത്തുവന്നിട്ടുണ്ട്. സംഭവത്തിൽ പോലീസ് അന്വേഷണം ആരംഭിച്ചതായാണ് വിവരം.
