ന്യൂഡല്ഹി : പരിസ്ഥിതി സൗഹൃദമാക്കുന്നതിന്റെ ഭാഗമായി രാജ്യത്ത് പ്ലാസ്റ്റിക് ഉപയോഗത്തില് നിയന്ത്രണം കര്ശനമാക്കി കേന്ദ്രം. ഒറ്റത്തവണ ഉപയോഗിക്കുന്ന പ്ലാസ്റ്റിക്കിന് 2022 ജൂലൈ മുതല് നിരോധനം ഏര്പ്പെടുത്തും. നിരോധനം സംബന്ധിച്ച് കേന്ദ്ര പരിസ്ഥിതി മന്ത്രാലയം ഭേദഗതി ചട്ടം വിജ്ഞാപനം ചെയ്തു. പോളിത്തീന് കവറുകളുടെ കനം 120 മൈക്രോണായി ഉയര്ത്തണം.
നിലവില് 50 മൈക്രോണ് വരെയുള്ള പോളിത്തീന് കവറുകള് നിരോധിച്ചിട്ടുണ്ട്. കൂടുതല് കനമുള്ള പോളിത്തീന് കവറുകളുടെ നിരോധനം ഘട്ടം ഘട്ടമായാണ് നടപ്പാക്കുക. പുതിയ ഉത്തരവ് പ്രകാരം 75 മൈക്രോണില് താഴെയുള്ള പോളിത്തീന് കവറുകള് സെപ്റ്റംബര് 30 ഓടേ നിരോധിക്കും. അടുത്തവര്ഷം ഡിസംബര് 31ഓടേ 120 മൈക്രോണില് താഴെയുള്ള പോളിത്തീന് ബാഗുകളുടെ ഉപയോഗവും നിരോധിക്കുമെന്നും സര്ക്കാരിന്റെ ഉത്തരവില് പറയുന്നു.
ഒറ്റത്തവണ ഉപയോഗിക്കാനുള്ള പ്ലാസ്റ്റിക് കാരിബാഗുകളുടെയും മറ്റ് വസ്തുക്കളുടെയും നിര്മാണം, ഇറക്കുമതി, സ്റ്റോക്കിങ്, വിതരണം, വില്പ്പന എന്നിവയെല്ലാം ജൂലൈ മുതല് നിരോധിക്കും. പ്ലാസ്റ്റിക് പിടിയുള്ള ഇയര്ബഡ്സ്, ബലൂണുകളിലെ പ്ലാസ്ററിക്, കൊടികള്, ഐസ്ക്രീം സ്റ്റിക്കുകള്, അലങ്കാരത്തിനുള്ള തെര്മോകോള്, സിഗരറ്റ് പായ്ക്കറ്റുകള്, ക്ഷണക്കത്തുകള്, 100 മൈക്രോണില് താഴെയുള്ള പ്ലാസ്റ്റിക്/പിവിസി ബാനുകള് എന്നിവയും ഇവയില് ഉള്പ്പെടും.
