പത്തനംതിട്ട : കേന്ദ്ര സര്‍ക്കാരിന്റെ സ്വകാര്യ കുത്തകകളോടുള്ള താത്പര്യവും സ്നേഹവും മൂലം പൊതുമേഖലാ സ്ഥാപനങ്ങളെ വളരുവാന്‍ അനുവദിക്കാതെ തകര്‍ക്കുവാനാണ് ശ്രമിക്കുന്നതെന്ന് ഡി.സി.സി. പ്രസിഡന്റ് പ്രൊഫ.സതീഷ് കൊച്ചുപറമ്പില്‍ പറഞ്ഞു. ഫെഡറേഷന്‍ ഓഫ് നാഷണല്‍ പോസ്റ്റല്‍ ഓര്‍ഗനൈസേഷന്‍ കൊല്ലം, പത്തനംതിട്ട ജില്ലാ ഡിവിഷണല്‍ സമ്മേളനം ഉദ്ഘാടനം നിര്‍വഹിക്കുകയായിരുന്നു അദ്ദേഹം. വളരെ മാതൃകാപരവും അഭിമാനകരവുമായ രീതിയില്‍ പ്രവര്‍ത്തിച്ച രാജ്യത്തെ പോസ്റ്റല്‍, ടെലികോം മേഖലകളെ സ്വകാര്യവത്കരിക്കുവാനുള്ള നീക്കമാണ് നരേന്ദ്രമോദി സര്‍ക്കാര്‍ നടത്തുന്നത്.
ഇതിനെതിരെ ഈ മേഖലകളിലെ എല്ലാ വിഭാഗം ജീവനക്കാരേയും അണിനിരത്തി ശക്തമായി പ്രതിരോധിക്കണമെന്നും ഡി.സി.സി. പ്രസിഡന്റ് ആവശ്യപ്പെട്ടു. പോസ്റ്റല്‍ സര്‍ക്കിള്‍ പ്രസിഡന്റ് ജോണി ജോസഫ് അധ്യക്ഷത വഹിച്ചു. ഡി.സി.സി. സംഘടനാകാര്യ ജനറല്‍ സെക്രട്ടറി സാമുവല്‍ കിഴക്കുപുറം, ഡിവിഷണല്‍ സെക്രട്ടറി വി.ഹരികുമാര്‍, ഡെപ്യൂട്ടി സര്‍ക്കിള്‍ സെക്രട്ടറി എസ്.എന്‍.സോണി, വനിതാ വിഭാഗം സംസ്ഥാന പ്രസിഡന്റ് അനു പി.ബേബി, കെ.ജി.മനു, ആല്‍ബര്‍ട്ട് ജോസഫ്, അഖില്‍ ജി.ജയ്സണ്‍, സുനില്‍ സോമശേഖരപിള്ള, എസ്.അനീഷ്, പി.ആര്‍.ഹരികൃഷ്ണന്‍ എന്നിവര്‍ പ്രസംഗിച്ചു.
