ഡല്ഹി : തീപിടുത്തം കൂടുന്നു ഇ-ബൈക്കുകളുടെ നിര്മ്മാണം നിര്ത്തി വെയ്ക്കാന് കേന്ദ്ര നിര്ദ്ദേശം. ഇലക്ട്രിക് വാഹനങ്ങളില് തീപിടിച്ച് അപകടമുണ്ടായ സംഭവങ്ങള് വര്ധിക്കുന്ന പശ്ചാത്തലത്തില് കടുത്ത നടപടിയുമായി കേന്ദ്രം. അപകടങ്ങളുമായി ബന്ധപ്പെട്ട അന്വേഷണങ്ങള് കഴിയുന്നതുവരെ കമ്പനികള് ഇലക്ട്രിക് സ്കൂട്ടറുകളുടേയും ബൈക്കുകളുടേയും പുതിയ മോഡലുകള് ലോഞ്ച് ചെയ്യരുതെന്നാണ് നിര്ദേശം. തീപിടിച്ച വാഹനങ്ങളില് ഒല, ഒകിനാവ, പ്യുവര് ഇവി എന്നീ പ്രമുഖ കമ്പനികളുടെ വാഹനങ്ങളും ഉള്പ്പെടുന്നുണ്ട്.
ഇലക്ട്രിക് വാഹനങ്ങള്ക്ക് സര്ക്കാര് പ്രോത്സാഹനം നല്കുന്നതിന്റേയും ഇന്ധനവില വര്ധിക്കുന്നതിന്റേയും പശ്ചാത്തലത്തില് നിരവധി സ്റ്റാര്ട്ട് അപ്പുകളാണ് പുതിയ മോഡലുകള് ലോഞ്ച് ചെയ്യാന് തയാറായിരുന്നത്. തീപടര്ന്ന് അപകടം റിപ്പോര്ട്ട് ചെയ്ത മോഡലുകള് വിപണിയില് നിന്ന് നീക്കം ചെയ്യണമെന്ന് നിര്ദേശിക്കാനും കേന്ദ്രം ആലോചിക്കുന്നുണ്ട്.
കമ്പനികള് വാഹന നിര്മാണത്തില് അശ്രദ്ധ കാണിച്ചെന്ന് കണ്ടെത്തിയാല് കനത്ത പിഴ ചുമത്തുമെന്നും കേന്ദ്രം വാഹനനിര്മാതാക്കളെ അറിയിച്ചിട്ടുണ്ട്. യാത്രക്കാരുടെ സുരക്ഷയാണ് സര്ക്കാരിന് പ്രധാനമെന്ന് മന്ത്രാലയം വ്യക്തമാക്കി. തീപിടുത്തങ്ങളുടെ പശ്ചാത്തലത്തില് സര്ക്കാര് തിങ്കളാഴ്ച ഇലക്ട്രിക് വാഹന നിര്മാതാക്കളുടെ യോഗം വിളിച്ചുചേര്ത്തിരുന്നു.
