ഇടുക്കി : മകനും കുടുംബവും കത്തിയമരുന്നത് കണ്ടിട്ടും പകതീരാതെ വീണ്ടും പെട്രോള് കുപ്പി മുറിക്കുള്ളിലേയ്ക്ക് എറിഞ്ഞ് ഹമീദ്. ചീനിക്കുഴിയിലെ വാര്ത്ത ഞെട്ടലോടെയാണ് പുറം ലോകം കേട്ടത്. കുടുംബ വഴക്കിന്റെ പേരില് അച്ഛന് സ്വന്തം മകനെയും ഭാര്യയേയും പേരക്കുട്ടികളെയും തീ വച്ച് കൊലപ്പെടുത്തിയെന്ന വാര്ത്തയുടെ ഞെട്ടലില് നിന്ന് പ്രദേശവാസികള് ഇതുവരെ മുക്തരായിട്ടില്ല. കൃത്യമായ ആസൂത്രണത്തോടെയാണ് പിതാവ് ഹമീദ് കൃത്യം നടത്തിയത്. കൊലപാതകം നടത്തുന്നതിനായി ഹമീദ് പെട്രോള് നേരത്തെ കരുതിയിരുന്നു. മകനും കുടുംബവും രക്ഷപ്പെടാനുള്ള എല്ലാ പഴുതുകളും അടച്ച ശേഷമായിരുന്നു കൃത്യം നടത്തിയത്.
തീ പിടുത്തം നാട്ടുകാരുടെ ശ്രദ്ധയില്പ്പെട്ടാല് വെള്ളമൊഴിച്ച് തീ കെടുത്താന് ശ്രമിക്കും എന്നതിനാല്, വീട്ടിലേയും അയല് വീട്ടിലേയും ടാങ്കുകളിലെ വെള്ളം ഹമീദ് നേരത്തെ തന്നെ ഒഴുക്കിവിട്ടിരുന്നു. മോട്ടര് അടിച്ച് വെള്ളം ലഭ്യമാകാതിരിക്കാന് വൈദ്യുതിയും വിച്ഛേദിച്ചു. വീടിന്റെ വാതിലുകളെല്ലാം പുറത്ത് നിന്ന് പൂട്ടി. ശേഷം ജനലിലൂടെ പെട്രോള് അകത്തേക്ക് എറിഞ്ഞ് തീ വയ്ക്കുകയായിരുന്നു. തീ ഉയര്ന്നതോടെ രക്ഷപ്പെടാനായി ഫൈസലും കുടുംബവും കുളിമുറിയിലേക്ക് ഓടിക്കയറിയെങ്കിലും വെള്ളമില്ലാത്തതിനാല് കുടുംബം അഗ്നിക്കിരയാവുകയായിരുന്നു.
തീ ആളിപ്പടരുന്നത് കണ്ട് നാട്ടുകാരെല്ലാം ഓടിക്കൂടിയപ്പോഴും, തീ വയ്ക്കാന് ഉപയോഗിച്ച പെട്രോള് കുപ്പി വീണ്ടും ജനലിലൂടെ വീട്ടിലേക്ക് വലിച്ചെറിയാന് ഹമീദ് ശ്രമിച്ചു. നാട്ടുകാര് ചേര്ന്നാണ് ഹമീദിനെ പിന്തിരിപ്പിച്ചത്. ഹമീദിന്റെ മകന് മുഹമ്മദ് ഫൈസല്, മരുമകള് ഷീബ, പേരക്കുട്ടികളായ മെഹ്റു, അസ്ന എന്നിവരാണ് മരിച്ചത്. ഹമീദിനെ പോലീസ് കസ്റ്റഡിയിലെടുത്തിട്ടുണ്ട്.
