അടൂര്‍ : മനം മയക്കുന്ന മണവും രുചിയുമുള്ള ചെമ്പടാക്ക് കൃഷിയില്‍ വിജയം കൊയ്ത്‌ അടൂര്‍ സ്വദേശി. അടൂര്‍ നെല്ലിമൂട്ടില്‍ തോട്ടുവ വീട്ടില്‍ റേ തോമസ്. ചക്കയിനത്തില്‍പ്പെട്ട ബോര്‍ണിയോ വനാന്തരങ്ങളില്‍ ജന്മം കൊണ്ടതാണ് ചെമ്പ ടാക്ക്. വിദേശ പഴച്ചെടികള്‍ കൃഷിചെയ്യുന്നവര്‍ നിരവധിപേര്‍ കേരളത്തിലുണ്ട്. എന്നാല്‍ ചെമ്പടാക്ക് കൃഷി ചെയ്യുന്നവര്‍ വളരെ ചുരുക്കമാണ്.
ചക്കയുടെ രൂപസാദൃശ്യമുള്ള ചെമ്പടാക്ക് വളരെ ചെറുതാണ്. ഉള്ളില്‍ രണ്ടില്‍ കൂടുതല്‍ ചുള വരില്ല എന്നതാണ് പ്രധാന പ്രത്യേകത. ഒപ്പം പഴുത്ത ചുളയ്ക്ക് നല്ല മണവുമാണ്. ഒരുകിലോ മുതല്‍ ഒന്നരകിലോ വരെ തൂക്കമുണ്ട് ചെമ്പടാക്കിന്. ചുളകള്‍ക്ക് നല്ല മഞ്ഞകലര്‍ന്ന ഓറഞ്ച് നിറവും നല്ല മധുരവുമാണ്. കടും പച്ചനിറത്തിലുള്ള ഇലകളും തണ്ടുകളും രോമാവൃതമാണെന്നത് ഇതിനെ ചക്കയില്‍നിന്ന് വ്യത്യസ്തമാക്കുന്നു. ചെമ്പടാക്ക് നമ്മുടെ നാട്ടില്‍ പൊതുവെ പിടിച്ചുവരാന്‍ പ്രയാസമുള്ളതാണെന്ന് റേ തോമസ് പറയുന്നു.
പൊതുവെ തെക്കു കിഴക്കന്‍ ഏഷ്യന്‍ രാജ്യങ്ങളിലാണ് ഇവ വ്യാപകമായി കണ്ടുവരുന്നതെന്നും ഇദ്ദേഹം പറയുന്നു. ചെമ്പടാക്ക് നട്ടുപിടിപ്പിക്കാന്‍ തിരഞ്ഞെടുക്കുന്ന സ്ഥലത്ത് നല്ല നീര്‍വാഴ്ചയും സൂര്യപ്രകാശവും വേണം. പ്ലാവ് വളരുന്ന ഏത് മണ്ണിലും ചെമ്പടാക്കും കൃഷിചെയ്യാം. തൈ നട്ട് ആദ്യത്തെ രണ്ടുവര്‍ഷം പ്രത്യേക പരിപാലനം വളരെ ആവശ്യമാണ്.
