ചെങ്ങന്നൂർ: ചെങ്ങന്നൂര് നഗരസഭാ സെക്രട്ടറിയെ കൗൺസിലര് മര്ദ്ദിച്ചു. നഗരസഭാ സെക്രട്ടറി എസ്.നാരായണനെ വാർഡ് കൗൺസിലറും സ്വർണ്ണക്കട ഉടമയുമായ രാജൻ കണ്ണാട്ടിന്റെ നേതൃത്വത്തിൽ മർദ്ദിക്കുകയായിരുന്നു. ഇന്ന് രാവിലെ എട്ടരയോടെയാണ് സംഭവം.
നഗരസഭയുടെ ഉടമസ്ഥതയിലുള്ള ശാസ്താംപുറം മാർക്കറ്റിലെ ഷോപ്പിംഗ് കോംപ്ലക്സിന്റെ മുൻഭാഗത്ത് സ്ഥാപിച്ച അനധികൃത ബോർഡുകളും വഴി തടസം സൃഷ്ടിച്ച് നിർമ്മിച്ച കൽക്കെട്ടുകളും മറ്റും പൊളിച്ചുനീക്കാൻ നഗരസഭ ജീവനക്കാർ എത്തിയപ്പോഴാണ് സെക്രട്ടറിയെ ആക്രമിച്ചത്. നഗരസഭ കൗൺസിൽ തീരുമാനപ്രകാരമാണ് അനധികൃത നിർമ്മാണം പൊളിക്കാൻ എത്തിയതെന്നും കൗൺസിലർ രാജൻ കണ്ണാട്ടും മകനും തമിഴ്നാട് സ്വദേശിയും ചേർന്ന് മർദ്ദിക്കുകയായിരുന്നു എന്നും നഗരസഭ സെക്രട്ടറി പറഞ്ഞു.
