മാഹി : മാഹി സ്വദേശി കൊവിഡ് മൂലം മരിച്ച സംഭവത്തില് മരണം കേരളത്തിന്റെ കണക്കില് ഉള്പ്പെടുത്തില്ലെന്ന് മുഖ്യമന്ത്രി പിണറായി വിജയൻ. പരിയാരത്തെ സര്ക്കാര് മെഡിക്കല് കോളേജില് ചികിത്സയിലിരിക്കെ മരിച്ച മാഹി സ്വദേശി മെഹ്റൂഫിനെ കേരളത്തില് മരിച്ചവരുടെ പട്ടികയില് ഉള്പ്പെടുത്താന് സാധിക്കില്ലെന്ന് ആരോഗ്യവകുപ്പ് വ്യക്തമാക്കി. പുതുച്ചേരിയുടെ കണക്കില് മെഹ്റൂഫിന്റെ പേരുകൂടി ഉള്പ്പെടുത്തണമെന്നാണ് സംസ്ഥാനത്തിന്റെ ആവശ്യം.
കേന്ദ്ര സര്ക്കാര് മെഹ്റൂഫിന്റെ പേര് കേരളത്തിന്റെ കണക്കില് ചേര്ത്തു കഴിഞ്ഞു. കഴിഞ്ഞ മാസം പതിനൊന്നിനാണ് മാഹി ചെറുകല്ലായി സ്വദേശി പി.മെഹ്റൂഫ് മരിച്ചത്. കോഴിക്കോടും, കണ്ണൂരുമായി അതിര്ത്തി പങ്കിടുന്ന മാഹി പുതുച്ചേരി സംസ്ഥാനത്തിന്റെ ഭാഗമായതു കൊണ്ടു തന്നെ മെഹ്റൂഫിന്റെ മരണം കേരളത്തിന്റെ കണക്കില് ഉള്പ്പെടുത്താനാകില്ലെന്ന് ആരോഗ്യവകുപ്പ് നിലപാടെടുത്തു. എന്നാല് മരണം സംഭവിച്ചത് കണ്ണൂരിലായതുകൊണ്ട് മെഹറൂഫിന്റെ പേര് കേരളത്തിലെ കൊവിഡ് മരണങ്ങളുടെ പട്ടികയിലാണ് ചേര്ക്കേണ്ടതെന്ന നിലപാടില് തന്നെ ഉറച്ച് നില്ക്കുകയാണ് പുതുച്ചേരി സര്ക്കാര്. മെഹ്റൂഫിനെ പുതുച്ചേരിയുെട പട്ടികയില് ചേര്ക്കണമെന്നാണ് കുടുംബത്തിന്റെ ആവശ്യം. ഇതുമായി ബന്ധപ്പെട്ട് മാഹി അഡ്മിനിട്രേറ്ററെ സമീപിക്കുമെന്ന് മെഹ്റൂഫിന്റെ മകന് നദീം പറഞ്ഞു.
