തിരുവനന്തപുരം: പൊതു ഇടങ്ങളില് മാലിന്യം തള്ളുന്നവര്ക്കെതിരെ നടപടിയെടുക്കണമെന്ന് മുഖ്യമന്ത്രി പിണറായി വിജയന്. മാലിന്യ സംസ്കരണത്തിന് ആവശ്യമായ ഭൂമി തദ്ദേശ സ്വയംഭരണ സ്ഥാപനങ്ങള് കണ്ടെത്തണമെന്നും ജൂണ് 5-ന് മുന്പ് ഉറവിട മാലിന്യ സംസ്കരണം ഉറപ്പാക്കണമെന്നും സംസ്ഥാനത്തെ തദ്ദേശസ്വയംഭരണ സ്ഥാപനങ്ങളുടെ പ്രതിനിധികളുമായി സംസാരിക്കവേ മുഖ്യമന്ത്രി പറഞ്ഞു.
പരിസ്ഥിതി ദിനത്തില് തദ്ദേശ സ്ഥാപനങ്ങളെ വലിച്ചെറിയല് മുക്ത സഭകളാക്കി പ്രഖ്യാപിക്കാന് കഴിയണം. മുഴുവന് ഓഫീസുകളും മാലിന്യ മുക്തമാക്കാന് ഉദ്യോഗസ്ഥര് ശ്രദ്ധിക്കണമെന്നും മുഖ്യമന്ത്രി നിര്ദേശിച്ചു. 2016 മുതല് മാലിന്യ സംസ്കരണ രംഗത്ത് പുതിയ ചുവടുവയ്പ്പുകള് നടത്തുകയാണ്. അതില് ഹരിത കേരള മിഷന് ഏറ്റവും ശ്രദ്ധേയമെന്നും മുഖ്യമന്ത്രി പറഞ്ഞു. മാലിന്യ പ്ലാന്റുകള്ക്കെതിരായ സമരങ്ങള് ദുരനുഭവമെന്നും മുഖ്യമന്ത്രി പറഞ്ഞു. ജനങ്ങളെ ബോധ്യപ്പെടുത്തി തിരുത്തണമെന്നും തെറ്റിദ്ധാരണ അകറ്റാന് ജനപ്രതിനിധികള് തയാറാകണമെന്നും അദ്ദേഹം ആവശ്യപ്പെട്ടു.
