കണ്ണൂര്: തയ്യില് കടപ്പുറത്ത് ഒന്നര വയസുകാരനെ കൊലപ്പെടുത്തിയ കേസില് അമ്മ ശരണ്യയ്ക്ക് പിന്നാലെ കാമുകനും അറസ്റ്റിലായി. ശരണ്യയുടെ കാമുകനായിരുന്ന നിധിനെ പ്രേരണാക്കുറ്റം ചുമത്തിയാണ് പോലീസ് അറസ്റ്റ് ചെയ്തിരിക്കുന്നത്. കുട്ടിയെ കൊലപ്പെടുത്താന് കാമുകന്റെ പ്രേരണ ശരണ്യയ്ക്ക് മേല് ഉണ്ടായിരുന്നുവെന്ന് സംശയിക്കുന്നതായി ഭര്ത്താവ് പ്രണവ് പോലീസില് മൊഴി നല്കിയിരുന്നു. ഇതേതുടര്ന്ന് പോലീസ് നടത്തിയ അന്വേഷണത്തിന് പിന്നാലെയാണ് പ്രേരണയ്ക്ക് കാമുകന് അറസ്റ്റിലായത്. ഇയാളെ പോലീസ് വിശദമായി ചോദ്യംചെയ്യും. കുട്ടിയെ കൊലപ്പെടുത്തിയതിന്റെ തലേദിവസം കാമുകനും ശരണ്യയും വീടിന് സമീപം കൂടിക്കാഴ്ച നടന്നുവെന്നും പോലീസിന് വ്യക്തമായിട്ടുണ്ട്. കേസില് നേരത്തെ തന്നെ നിധിന്റെ മൊഴി പോലീസ് രേഖപ്പെടുത്തിയിരുന്നു.
അടച്ചിട്ട വീട്ടില് അച്ഛനൊപ്പം കിടന്നുറങ്ങിയ കുട്ടിയെ കടല്തീരത്ത് മരിച്ച നിലയില് കണ്ടെത്തിയതില് ദുരൂഹതയുണ്ടെന്ന് ആരോപിച്ച് കുട്ടിയുടെ പിതാവ് പോലീസില് പരാതി നല്കുകയായിരുന്നു. കാമുകനൊപ്പം ജീവിക്കാനാണ് ശരണ്യ ഒന്നര വയസുളള മകനെ കൊലപ്പെടുത്തിയത്. ഭര്ത്താവുമായി അകന്ന് സ്വന്തം മാതാപിതാക്കള്ക്കൊപ്പമായിരുന്നു ശരണ്യയുടെ താമസം. എന്നാല് ഞായറാഴ്ച ഭര്ത്താവിനെ വിളിച്ചുവരുത്തി വീട്ടില് താമസിപ്പിച്ചു. പിറ്റേന്നു പുലര്ച്ചെയാണ് മകനെ കൊന്നത്. കുറ്റം ഭര്ത്താവിനുമേല് ചുമത്തിയശേഷം കാമുകനൊപ്പം ജീവിക്കുകയായിരുന്നു ശരണ്യയുടെ പദ്ധതി.
പോലീസ് ചോദ്യം ചെയ്യലില് ഭര്ത്താവാണ് മകനെ കൊന്നതെന്നാണ് ശരണ്യ ആവര്ത്തിച്ചത്. എന്നാല് ഫൊറന്സിക് പരിശോധനയില് ശരണ്യ ധരിച്ച വസ്ത്രത്തില് ഉപ്പുവെളളത്തിന്റെ സാന്നിധ്യമുണ്ടായി രുന്നതായി സ്ഥിരീകരിച്ചു. ശരണ്യയുടെ ഫോണ് കോളുകള് പരിശോധിച്ചപ്പോള് ഫെയ്സ്ബുക്ക് വഴി പരിചയപ്പെട്ട കാമുകനെക്കുറിച്ച് വിവരം ലഭിച്ചു. തുടര്ന്നുളള ചോദ്യം ചെയ്യലിലാണ് ശരണ്യ കുറ്റം സമ്മതിച്ചത്.
