ചിറ്റാര് : ചിറ്റാര് ഗവണ്മെന്റ് ഹയര് സെക്കന്ഡറി സ്കൂള് പരിസരം കാട് കയറി ഇഴജന്തുക്കളും കാട്ടുപന്നിയും താവളമാക്കി. അധ്യയന വര്ഷം ആരംഭിച്ചപ്പോള് സ്കൂള് മുറ്റത്ത് വളര്ന്നു നിന്നിരുന്ന ചെറിയ കാടുകള് നീക്കം ചെയ്ത് പഠനം ആരംഭിക്കുകയാണ് സ്കൂള് അധികൃതര് ചെയ്തത്. എന്നാല് തൊട്ടടുത്ത് വര്ഷങ്ങളായി കാടുകയറി കിടക്കുന്ന പറമ്പ് വൃത്തിയാക്കാന് അധികാരികള് തയ്യാറായില്ല. കാടുകയറി കിടക്കുന്ന സ്കൂള് പരിസരത്ത് കാട്ടുപന്നിയും പാമ്പുകള് ഉള്പ്പെടെയുള്ള ഇഴജന്തുക്കളും താവളമാക്കിയിട്ടുണ്ട്. പകല് സമയങ്ങളില് പോലും ഇവിടെ നിന്നും പന്നിയും മറ്റും ഓടിപ്പോകുന്നത് കാണാറുള്ളതായി സ്കൂള് കുട്ടികളും പറയുന്നു.
സ്കൂള് പ്രവര്ത്തി ദിവസങ്ങളില് ഈ പരിസരത്താണ് കുട്ടികള് കളിക്കുന്നത്. ഹയര് സെക്കണ്ടറി വിഭാഗം സ്ഥിതി ചെയ്യുന്ന കെട്ടിടത്തിന് സമീപത്തും കാടുകള് വളര്ന്നിട്ടുണ്ട്. വര്ഷങ്ങളായി കാട് വളര്ന്നു നില്ക്കുന്ന പറമ്പില് വലിയ മരങ്ങളുമുണ്ട്. കാടുകയറി കിടക്കുന്ന ഈ പ്രദേശം സമീപവാസികള്ക്കും ഭീഷണിയാണ്. ചിറ്റാര് ഗ്രാമപഞ്ചായത്തും ഈ വിഷയത്തില് മൗനം പാലിക്കുകയാണ്. സ്കൂള് തുറക്കുന്നതിന് മുന്പ് തന്നെ സ്കൂള് പരിസരം വൃത്തിയാക്കേണ്ടിയിരുന്നിട്ടും ഈ വിഷയത്തില് അധികാരികള് ആരും തന്നെ മുന്കയ്യെടുത്തില്ലെന്നും കുട്ടികളുടെ രക്ഷിതാക്കള് പറയുന്നു.
